e leh missile 700 chuang hmanga Ukraine an kahnaah mi 18 an thi niin tual chhung thuneituten an sawi a, thla tam tak chhunga beihna an tawh nat ber tum a ni tih an sawi.
Thuneitute chuan chhim lama lawng chawlhna khawpui, Odesa-ah mi pakua an thi tih an sawi a, ram lailia Dnipro khawpuiah mi 5 an thi bawk tih an sawi a. Khawpui ber, Kyiv-ah naupang pakhat telin mi pali an thi bawk.
Russia-ah pawh Ukraine-in drone hmanga chhim lam Krasnodar biala beihpui a thlaknaah nausen telin mi pahnih an thi niin Moscow-in a sawi.
Kartawp khan Orthodox Easter pualin inkahhai rei vak lo an kalpui hnua inbeih lehna a ni a, ram pahnihte hi inkahhai bawhchhiaah an inpuh nasa hle bawk.
Russia hian February, 2022 atang khan Ukraine hi thapuiin a bei tan.
Kyiv-ah chuan Ningani zing dar 02:30 (India-a zing dar 05:00) khan inralrinna siren tihrik niin a hnu lawkah bomb a puak zui.
Hmututen online-a thlalak an dah chhuahah chuan khawpui hmun hrang hrangah meikhu dum chhah tak tak a awm tih a lang a. Video pakhatah chuan apartment block sira drone tla lai a lang bawk.
Kyiv Mayor Vitali Klitschko-a chuan Telegram-ah mi pali thi zingah naupang kum 12 mi a tel tih a tar lang a. Mi 45 dangin hliam an tuar bawk.
Mayor chuan khawpui chhunga Central Podil district-a chenna in chhawng 16-a sang chim atangin chhanchhuaktute chuan nu leh naupang an la chhuak tih a sawi bawk.
Khawpui hmar lama hliam tuar zingah hian emergency medical worker pali an tel.
Dnipro-ah chuan region head Oleksandr Ganzha-a chuan Russian-te beihnaah mi pali an thi a, mi thahnem takin hliam an tuar tih a sawi a. Hemi hma hian khawpui Mayor Borys Filatov-a chuan Ningani khan ruang dang pakhat chhar a nih thu a sawi bawk.
Drone-a hmarchhaka khawpui, Kharkiv beihnaah hmeichhia kum 77 mi leh mipa kum 66 miin hliam an tuar niin thuneituin a sawi.
Chhim lama khawpui pahnih, Mykolaiv leh Kherson chu power nei lovin an awm niin tualchhung thuneitute an sawi.
Ukraine air force chuan Ningani zing khan Russia-in darkar 24 kalta chhungn drone 659 leh cruise leh ballistic missile 44 an kap chhuak tih an sawi.
Drone 636 leh missile 31 kah thlak a nih thu an sawi a, hmun 26 kah fuh a ni thung tih an sawi bawk.
Ukrainian President Volodymyr Zelensky-a chuan an ram beihna hi a dem thu a sawi a, X-ah US leh Europe-in Russia an hrekna chu tihnep chi a nih lohzia a lang niin a tar lang.
Russia-a Krasnodar bialah Ukraine-in zankhuaa drone hmanga beihpui a thlakah Tuapse khawpuiah hmeichhe naupang kum 14 mi telin mi pahnih an thi niin an Governor Veniamin Kondratyev-a’n a sawi a. Mi dang pangain hliam an tuar tih a sawi bawk.
Ukraine-a indona hi a kum ngana a ni tawh a, remna zawnga inbiakna vawi eng emaw zat neih a ni tawh a, US-in palai hna a thawk a. Mahse, US President Donald Trump-a’n Middle East-a indona lam hawia a ngaihtuahna a hman hnuah indawrna hi ding rih.
Russia-in zankhuaa Ukraine a beihnaah mi 18 thi
