Russia, Ukraine & US inbiak vawi khatnain rah tha chhuah lo
Indona nasa tak a awm mek laiin a vawi khat nana Russia, Ukraine leh US ram aiawhte indo titawptura a Abu Dhabi-a an inbiakna chuan rah tha chhuah a nei lo.
Ukrainian President Volodymyr Zelensky-a chuan inbiak vawi hnihna hi tun kar tir lamah a awm leh mai theih thu a sawi a, American thuneitu erawh chuan February 1-ah tan a ni leh dawn tih a sawi thung.
Russian-ten van sang atanga Ukraine beia nasa taka energy hmunpui tichhiaa mi pakhat thihna leh hliam tuar mi 35 an awm phahna a thlen mek laiin inbiakna hi ni hnih chhung kalpui a ni.
Russia chuan Ukrainian ram an luahsak chinah Ukraine-in ambulance beiin damdawi thiam pathum an that niin an sawi a. A hnuah Ukrainian missile hmangin Belgorad-a an energy hmun an kap fuh leh bawk niin an sawi.
Abu Dhabi-a inbiakna hi Kremlin-in um 2022-a an thenawm a rûn hnua ram pathum aiawhte an inbiakna hmasa ber a ni.
“Kan tum ber chu kawng hrang hranga indo tihtawp dan tur sawi a ni,” tiin Zelensky-a’n X-ah a tar lang.
Ram tin aiawhte hi ‘an khawpui theuhva an thil sawi an thlen’ leh dawn a. US thuneitu pakhat chuan, “Inbiak thawh hnihna hi Pathianni hian Abu Dhabi-ah bawk tan leh a ang,” a ti.
Inbiak chhunzawm tura thu dah chu ‘thil tha lantirna’ leh ni hnih indawr chhungin ‘hna tam tak thawh’ a ni tih a lang tih a sawi bawk.
Russian state news agency Ria-Novosti chuan Moscow chu Ukraine leh US nena inbe turin a la inhawng reng tih a sawi.
Ukrainian khawpui, Kyiv Mayor Vitali Klitschko-a chuan Zirtawpni zana Russian-ten an kahnaah mi pakhat thiin mi dang paliin hliam an tuar niin a sawi a. Kharkiv mayor pawhin mi 31 an hliam tih a sawi bawk.
Kyiv-a hmun pawimawhte a chhe nasa niin Klitschko chuan a sawi a, in 6,000 velin intihlumna tur an nei lo niin a sawi.
Ukraine hmun thenkhatah hian -12°C vel a ni a. Zelensky-a chuan ‘Russian-te tum lian ber chu’ an energy hmun a ni tih a sawi.
Kharkiv Mayor Ihor Terekhov-a chuan nau neihna damdawi in leh in leh lo chhuahsana tlanchhiate awmna hostel kah fuh niin a sawi.
Hetih lai hian Russia pawhin Kherson-a an awp lai hmun thenkhatah Ukraine chu ‘civil mite lakah rawng takin an che’ niin an sawi bawk.
Russian foreign ministry thupuangtu, Maria Zakharova chuan Ukrainian drone hmangin Oleshky central district hospital atanga chhuak medical team chuanna ambulance chu Hola Prystan khaw luh dawnah kah fuh niin a chuang damdawi thiam pathum an thu vek tih a sawi.
Inrinni zan khan Belgorod Governor Vyacheslav Gladkov chuan Kharkiv nena inrina bawra awm khawpui hi indo hnua a Ukraine-in an beih nasat ber tum an tawng niin a sawi bawk.
Abu Dhabi-a inbiak tan hma ni khan US special envoy Steve Witkoff leh US President Donald Trump-a makpa, Jared Kushner chuan Moscow-ah Russian President Vladimir Putin-a an hmu.
Darkar li vel an inbiak hnuah Kremlin thupuangtu, Yury Ushakov-a chuan, “Putin-a hian Russia chu politic leh palai hmanga Ukraine buaina chin felna kawngah ke pen zel a duh,” tiin a sawi.
August thla khan Trump-a leh Putin-a hi Anchorage, Alaska-a inbiain Russia-in Donbas region an neiha kum 2014 atanga an awp, Crimean peninsula an luah zui theihna tur an pawm.
Zelensky-a thungin Russia-in hmun tam zawk an luahsak mek, Luhansk leh Donetsk awmna, Donbas chu an hmelma hnena pek a phal lo thung.
Russia, Ukraine & US inbiak vawi khatnain rah tha chhuah lo
