Sabalenka last 4, Swiatek tla fel!

Sabalenka last 4, Swiatek tla fel!
Indian Wells-a US Open inbuatsaihna tournament lian kal mek BNP Paribas Open hmeichhe singles lamah nimin khan top seed Aryna Sabalenka chuan future champion a tih mai Victoria Mboko lakah fiahna tling inkhel paltlangin semi-final a lut a; quarter-final match dangah tlawm zawk tura ngaih Elina Svitolina lakah Iga Swiatek a chak lo ringawt thung!
World number one Sabalenka hian women’s draw inbeihna hautak zetah 7-6(0), 6-4-in Cadadian tleirawl kum 19 mi Mboko a paltlang hram.
Kum 2022 leh 2024-a Indian Wells champion lo ni tawh Swiatek erawh Svitolina chuan 6-2, 4-6, 6-4-in a hnawtchhuak a, world number two laka a hnehna sualchhuah hmangin kum sa rih chhunga a vawi khatna atan Ukrainian Svitolina chuan Indian Wells semi-final a lut.
Belarusian Sabalenka hian rising talent Mboko lakah rim taka thawkin set khatna a la hram a, set hnihnaah pawh Mboko hi four-times Grand Slam champion tana chai tham ngial a la ni tlat!
Hnehna a chan hnuah Sabalenka hian a tumpui fakin, future Grand Slam champion a ni chiang tih a sawi a, tunlaiah la naupang tak chunga hmeichhe player hlauh nei lo an rawn lawr tuam tuam chu mak a tih thu hahipin a sawilang tel!
A career-a WTA 1,000 title pakua la tling tawh Sabalenka tum leh tur 14th seed Linda Noskova chuan quarter-final inkhel dangah lasi thawnthu ang maia chak tluang mek Australian qualifier Talia Gibson-a kal zel tur chu 6-2, 4-6, 6-2-in a dangbet a, a tum hnihna atan Czech hian WTA 1000 semi-final a lut.
Kum 21-a upa Gibson hi tunah world number 112-na niin, tun kha WTA 1,000 main draw a khelh vawi khatna a ni a; Thawhlehnia seventh seed Jasmine Paolini a hneh khan qualifier ni chunga kum 11 chhung he tournament-a quarter-final lut thei hmasaber a ni a, semi-final em erawh a chuangkai zo ta rih lo a ni.
Australian Open champion Elena Rybakina pawhin last eight match dangah 6-1, 7-6(4)-in American Jessica Pegula a hneh a, Indian Wells semi‑final pakhat zawkah Svitolina a hmachhawn leh ang.
He mite pahnih inkhel turah kum 2023 champion leh tuntuma third seed Rybakina zawk hian final a lut a nih chuan karleh Thawhtannia WTA ranking thar tarchhuah turah Swiatek hmakhalhin, a career-a a tawn san ber world number two dinhmun a luah thei dawn a ni.