Sabrina Carpenter album thar ‘Man’s Best Friend’ chuan kumina hmeichhe zaithiam album tlangzarh tawh zinga ni khat (darkar 24) chhunga Spotify-a stream nasat ber record a siam.
Spotify-in niminpiah-a an puan danin hla 12 awmna ‘Man’s Best Friend’ album hi a ni khatnaah Spotify-ah vawi maktaduai 64.4 stream a kai hman a, kumina hmeichhe zaithiam album tlangzarh tawhah chuan ni khata he streaming service-a stream nasat ber a la ni a, Ariana Grande, Beyonce leh Taylor Swift te pawh a khum tlat.
He album-ah hian hla thu hruanghruau deuh tak tak te pawh a awm nawk mai a, a cover art nen boruak a nei deuh hat a. A album cover an tichhuah hmasak ber atangin boruak a nei nghal a, a cover-ah chuan Sabrina chu bawk vak ang deuha awmin, mipain a sam a keh sak bawk a. He album cover hi a ‘nasa mah mah’ tipawl an awm a, ‘hmeichhia dah hniamna’ tipawl an awm bawk. Mahse, heng sawiselna te hian a tilar sauh thung!
He album atanga a single pahnihna ‘Tears’ pawh an tihchhuah ni khatnaah stream maktaduai 9.2 a kai thei a, hei hi kumin bikah chuan hmeichhe zaithiam hla tihchhuah zinga nikhata stream nasat ber record a la ni. He album-a hla zawng zawng hi Spotify Top 20 Global Chart-ah an lang thei vek bawk.
Nikuma a album ‘Short n’ Sweet’ khan a ni khatnaah stream maktaduai 57 a kai thei a, kha album-a hla ‘Espresso’ leh ‘Please Please Please’ te pawh hlawhtlin pui hle a ni.
A album-in Spotify streaming a record a siam chungchangah Sabrina Carpenter chuan, “Ka awih lo lek lek zawk a ni. Min chhem kang dawrh mai alawm. In lo ngaihthlak avangin lawmthu ka hrilh mawlh mawlh che u,” a ti.
‘Man’s Best Friend’ hi Sabrina studio album pasarihna niin, August ni 29 khan a tlangzarh a, he project chungchang hi June thla khan a puang a, chumi hnuah he album atanga a lead single ‘Manchild’ a tichhuak nghal a, Billboard Hot 100 (US singles) chart-ah No.1 kaiin, he chart-a a hla No.1 kai thei pahnihna a ni.
Sabrina Carpenter ‘Man’s Best Friend’-in Spotify record siam
