Aizawl Sahuan atanga chhuak savawm pakhat chu man leh tuma ngawrh taka umzui a ni chungin, he chanchin buatsaih lai thleng hian man a la ni loa, Sahuan pawh hi khar chhunzawm rih a ni dawn.
Aizawl Zoological Park director sawi danin, savawm chhuak hi Aizawl Wildlife Division staff, Zoo veterinary officer leh staff bakah Zoo range officer leh a staff-te nen Sahuan ram huamchin leh a chhehvelah ngawrh taka zawn chhunzawm zel a ni a. Mihring theihna bakah drone pawh hman a nih rualin, savawm chhuak hi tranquilizer gun (kah mutna) hmanga kah mutna hmun remchang hmuh theih a la nih loh avang leh a hma lama trap/thang kam a la hlawhtlin loh avangin thang dang kam belh zel a ni a. Zawn chhunzawm zel a la nih dawn avangin Aizawl Zoological Park hi thu leh awm hma chu khar rih a ni tih mipui a hriattir.
Savawm chhuak hi Sahuana piang leh seilian a nih avangin tih thinrim hmasak a nih loh chuan ramhnuai savawm anga mihring tana hlauhawm lutuk a ni lo tura ngaih a ni tih sawini, Sahuan chhehvela cheng mipui chu thlabar lutuk lo turin a chah tih a sawi bawk.
He savawm hmu emaw a chin hria an awm a nih chuan a rang thei ang berin phone number – 8837322990 (Zoo RO) emaw 8974450937 (Aizawl Wildlife Division) ah call/ whatsapp hmanga hriattir turin an ngen tih a sawi a ni.
Sahuan atanga chhuak savawm la man thei lo
