North East Frontier Railway chuan Sairang – Hmawngbuchhuah sial tumin an inruahman mek a, chief minister ngenna angin Thenzawl khaw hnaih deuha relin a paltlang theih dan tur pawh an ruahman tha.
Mizoram Pro-Active Governance and Timely Implementation (Mi-PRAGATI) thutkhawm vawi thumna chu Ningani khan chief minister Lalduhoma kaihhruaia neih a ni a. Mi-PRAGATI hi state chhunga hmasawnna hnathawh lian zual vil a, harsatna an tawh chinfel dan dappuitu leh a tul anga department hrang hrang thawhhona tichak tura din a ni a. Sawrkar hnathawh langtlang leh rang zawka kalpui dan ngaihtuahtu thunei tak a ni.
Thutkhawmah hian NABARD RIDF sum hmanga Mizoram sawrkar hnathawh mek, project amount cheng vaibelchhe 3 aia tam chin project 53 ennawn a ni a. An zinga hna kal muang zual kal muan chhan sawifiah niin, chak zawka hnathawh dan tur pawh sawi a ni.
Cheng vaibelche 44800 vel senga thawh tur Sairang – Hmawngbuchhuah rel kawng ruahmanna NE Frontier Railways lamin an sawifiah a. He rel kawng hi km. 224 vela thui, station 20 awm tura duan a ni. Thenzawl Rel Station awmna tura riruan tawh chu Thenzawl khua atanga a hlat deuh avangin, chief minister hian hnai deuh zawka dah dan zawng turin a lo hrilh tawh a. Tun tum thutkhawmah hian hnai deuh zawka dah an tum dan an hrilhfiah a ni.
Ropuiliani Tribal Freedom Fighter Museum sak mek, State Tribal Institute sak mek, PM SHRI hmalakna kal mek, Swachh Bharat hmalakna, Kaladan Multi Modal Transit Transport Project hmalakna, PWD hnuaia hnathawh lian zualho, hnathawh timuang thei harsatna an tawh leh project kalpui lai enzui ngai bik sawiho a ni a. An harsatna chinfel dan tur sawi zui a ni.
Thutkhawmah hian Home minister K Sapdanga, EF&CC minister Lalthansanga, FCS&CA minister B Lalchhanzova, PHE minister Prof Lalnilawma bakah chief secretary Khilli Ram Meena leh a kaihhnawih official ho, Mizorama project lian thawktu central agency ho an tel a. Online-in Ministry of External Affairs aiawh, NHIDCL managing director, district bawrhsap-ten an zawm bawk.
Sairang-Hmawngbuchhuah rel kawng siam dan tur inhrilhfiah
