Sairang Rel Station ‘world class’ in ti dawn

Sairang Rel Station ‘world class’ in ti dawn
Sairang Rel Station chu ‘world class’ a siam turin Railways lamin an buaipui mek tih chief minister Lalduhoma chuan a sawi.
Assembly Session-a zawhna a chhannaah General Administration Department changtu chief minister hian, Railways lamin Sairang Rel Station hi rel station pangngai turin lo ruahman mah se, ministry lamah world class-a siam turin an ngen a, an lo phalsak mai a; hemi tur hian tih changtlun belh a ngaih viau avangin hemi atan hian cheng vaibelchhe 97 an sanction tawh a, tender pawh an hawng tawh nia a hriat thu a sawi.
Rel station building chu a dung leh a vang zawngin zawm tur a nih bakah building thar sak a ni a, a chhehvel cheimawi leh tih changtlun pawh a tel dawn tih a sawi a ni.
Member atanga rawtna, Sairang Rel Station-a ‘bazar ni’ neih pawh rawtna tha tak nia a hriat thu chief minister hian a sawi a. “Bazarpui ni bik tur siam ta ila, thil kan thawnchhuah ni bik turte, a lo luh ni turte tinzawnin, hei chu concern department – Commerce & Industries lamin lo enzui se, tihpuitlin tum nise,” a ti.
Sairang Rel Station huamchhungah Mizoram sawrkarin warehouse dah a duh avangin Union Railway minister nen pawh an sawidun tawh a, ram awl nei lo nia Railways lamin an sawi avangin, joint survey neih turin an dil nawn a, ram an pek theih chuan warehouse lian tak, state sawrkar sum pawhin a tih mai theih dawn tih a sawi a ni.