Food Corporation of India chuan Bairabi thleng Mizoram ei tur buhfai a phurh luh thin hnu ah Thawhlehni zing khan Sairang Rel Station thleng rel hmangin buhfai a phur thleng ta.
Sairang Rel Station-a rel hmanga buhfai phurh thlen quintal 25901 hi FCS&CA minister B Lalchhanzova chuan Sairang Rel Station-ah a lo hmuak a. Supply minister chuan furpui thleng turah a thlamuan thlak sawt tih a sawi a. Mizoram-in thla khata buhfai kan mamawh zat quintal 97000 atangin quintal 55000 hi FCI atanga dawn niin, a thlawnin quintal 41000 dawn a ni a, a bak zawng Open Market Sale Scheme atanga quintal-ah Rs. 830 a lei a ni tih a sawi.
Buhfai quality tha zawk lei tuma hma lak chho mek a ni, tiin, tunah chuan Aizawl, Lunglei leh Lawngtlai FCI kudam-a dah tur chu Sairang Rel Station-ah hian a lo thleng tawh dawn a. Bairabi Rel station-ah Mizoram hmar lam kudam-a dah tur a thleng ve tawh thung dawn tih a sawi a ni.
Sairang Rel station-a buhfai thleng turah hian Sairang Dinthar khawtlang hruaitute leh YMA nen pawh sawiho a ni a. Buhfai hi Pathianni zing leh zanah pawh a thlen hun a awm dawn a. Rel station atanga Sairang Dinthar-a FCI kudam-a lirthei lianin a thiar a ngai dawn a. Sairang khawtlang nun pawh a tih buai na chin a awm dawn tih B Lalchhanzova hian a sawi a. Hemi kawngah hian Sairang mipui dawhtheihna leh hriatthiamna a ngen lawk a, Sairang mipui harsatnaa hma lakpuitu tur Aizawl district bawrhsap leh SP Traffic Aizawl bakah FCI Divisional office chungah lawmthu a sawi tih a sawi bawk.
Buhfai hi rel wagon 42-a lo phurh thlen a ni a. Minister bakah hian State Consultative Committee of FCI chairman, Rajya Sabha MP K Vanlalvena, FCS&CA bakah Home department hotute, FCI Aizawl hotute an tel a ni.
Sairang thleng relin buhfai phur ta
