‘Saiyaara’-in vbc 300 la lut tling tawh
Bollywood a newcomer pahnih Ahaan Pandey leh Aneet Padda te channa romantic drama ‘Saiyaara’ chuan cinema hall ticket hralhna atangin ni 18 chhungin cheng vaibelchhe 302.25 a la lut thei a, tunah chuan Hindi movie boruak nei lian tak tak Padmaavat leh Sultan te lehpelin, Hindi film sum la lut tam 16-na a ni pha ta.
‘Saiyaara’ hian an tlangzarh kar, opening weekend-ah cheng vaibelchhe 172.75 a la lut nghal a, a kar hnihnaah vaibelchhe 107.75 lak luh belhin, weekend vawi thum a zo a, Thawhtanni kalta khan vaibelchhe 2.5 lak luh belhin, ni 18 chhungin ticket hralhna atangin cheng vaibelchhe 302.25 a la lut tling ta a ni.
Vaibelchhe 300 a pelh takah chuan Hindi blockbuster, Bollywood star Ranveer Singh, Deepika Padukone leh Shahid Kapoor te channa cheng vaibelchhe 302.15 la lut thei ‘Padmaavat’ leh cheng vaibelchhe 300.45 la lut thei Salman Khan leh Anushka Sharma te channa ‘Sultan’ a rawn lehpel ta a, tunkarah a la kaltluang zel a nih chuan Bajrangi Bhaijaan leh Tiger Zinda Hai te pawh lehpel leh thei tura beisei a ni.
Mohit Suri film siam, Ahaan Panday leh Aneet Padda te channa, romantic drama ‘Saiyaara’-ah hian Bollywood lama mithar ve ve chang dun mah se thalai lam a hip lehzual a, a thawnthu leh film hla ten lawm an hlawh bakah a changtute an chetha riau a, Ahaan leh Aneet te performance hi Bollywood star Anil Kapoor, Ranveer Singh, Alia Bhatt, Varun Dhawan leh Karan Johar te pawhin an fak thu social media lamah te an puang chhuak deuh mawlh mawlh. Mohit Suri hi Bollywood-a hmelthar chhawpchhuaktu tha tak niin, tuna star ni ta Emraan Hashmi, Shraddha Kappoor, Aditya Roy Kapur leh Sidharth Malhotra te pawh hi Bollywood-a a lo a vawrh chhuah tawh te an ni.
Hetihrual hian ‘Saiyaara’ hian Korean drama, 2004-a an tlangzarh tawh, Jung Woo-sung leh Son Ye-jin te channa ‘A Moment To Remember’ an copy niin thenkhatin an sawi ve thung a, heng film pahnih inanna video clip pawh social media lamah a viral leh nual tawh a, a tawngkam duhthawh zual deuh te phei chuan ‘A Moment to Remember’ hi credit pek ve hial tur alawm, an ti deuh hlawih hlawih!
Director Suri chuan ‘Saiyaara’ hi original script, Sankalp Sadanah nena an ziah dun niin a sawi ve thung a, Indian tana thlirna atanga ‘hmangaihnaa natna’ thawnthu han dai dar vel a chakna atanga a thawnthu pawh hi lo chhuak niin a sawi a, “Hmangaihnaah chuan natna pawh a awm ang…Hmangaihna dik a nih loh chuan chutiang chu an hre lo ang. Ka suangtuahna mai ni lovin ka ring nget tlat a ni,” a ti.
A thawnthuah chuan, Krish Kapoor (Ahaan Panday) chu musician thinchhe ve ang reng tak, lar chhuah tuma bei mek a ni a. Vaani Batra (Aneet Padda) chu journalist leh poet, ze zawi ve ang reng tak, a ngaihzawng nena an inthen avanga rilru lama hliam pai reng a ni ve thung. Krish chuan Vaani poem te a lo chhiar fuh hlauh mai a, a duh ta riau a, hlaa chantir a duh ta a. Tichuan an intawng ta, rilru lamah an inpawhin an inzawm nghal riau a, an inkarah hmangaihna duhawm tak a rawn chawrno ta a ni. Tichuan, hlim takin an awm dawn emaw an tih laiin Vaani zawk chuan Alzheimer’s disease a nei tan ta tlat mai le. A hriatrengna te a hloh tan a, Krish chu kawng peng thuamah, duhthlan tur zawk ngaihtuahin rilru buai takin a awm ta- a rimawi zinkawng a zawh zel dawn nge, Vaani kiangah awmin a enkawl zawk dawn?
‘Saiyaara’-in vbc 300 la lut tling tawh
