Spain midfielder hlui Cesc Fabregas chuan Chelsea tana Mohamed Salah nen an khelh dun lai boruak a thlirkir a, khatih lai khan Egypt superstar chu eng he hu a nih bik loh thu leh goal hmaa hlauhawm teh chiam a nih bik loh thu a sawi a, tuna a chimchin nen chuan inthlau tak a nih thu tunhnai khan a sawichhuak.
World Cup winner Fabregas hian Blues tana an khelh dun lai khan Mohamed Salah rinchhan chunga hlawhtlinna chan viau ngaihna a awm loh thu a sawi!
Tunah erawh Salah hi lehlam pawl defender-te chhaihbuaitu, an tha tikhurtu a tling a, trophy a hui mawlh mawlh a, golden boot dawng thei tur zawnnaah a chuhtu langsar a ni kumtin kal mek a nih hi!
Arsenal player hlui ni bawk Fabregas chuan Stamford Bridge-a an awmdun lai kha chuan Egyptian winger hi goal bula tawrhhlelhawm a nih bik loh thu leh tun hnu hian nungchang danglam daih a lo neih tawh thu electronic media kal-tlanga infiamna chung-chang tihchhuah thar BBC Sounds podcast Planet Premier League-ah a sawi.
Spaniard chuan, “Khatih lai kha chuan chance a hmu tam lote pawh a ni thei a, tun ang hian a la khawng hauh lo. Tunah chuan a ziarang kan hre tawh a, a tuan a rang a, attacking na tak a lantir thei tih kan hmu tawh bawk,” a ti.
Salah hi kum 2014 khan Jose Mourinho chuan Chelsea-ah seng-lutin, first team hmun a chang pha lo a, loan-in Itay lamah an thawnbo a, Fiorentina leh AS Roma thuam inbelin, kum 2016 khan Rome khaw team-in contract nghet an ziahpui ta nghe nghe a nih kha.
Kum 2017-ah Liver-pool-in England-ah an hruaikir leh a, Anfield club-ah chuan a dan a dang ta daih a, he thu buatsaih lai thleng hian Reds tan Premier League game 251-ah goal 153 thun tlingin, assist tum 67 a siamchhuak tling tawh a, tum thum ngawt Golden Boot dawng tawhin, khawvela player hraw berte zingah a lang pha ta hial a ni.
Egypt star Mohamed Salah hi karliamta Ni-ngani khan Africa Cup of Nations Group B match pakhata Ghana nen 2-2-a an inhnehtawk tumin a inhliam a, a ke na enkawl turin Liverpool khuaah a thlawkkir a, a tel loa an ramin semi-final an lut zo a nih chuan inkhel pawimawha a kirleh hman an beiseipui rih phawt.
Pathianni khan Li-verpool manager Jurgen Klopp chuan an player pawimawhin an club hmanruaa ngaiawh lehna zinkawng a zawh nghal char char tur thu a sawi a, a kaihza tha na chu hliam tenau a ni lo tih a tarlang nghal.
Klopp chuan Afcon-a kum 31 mi Salah kirleh theih a beiseipui em tih zawhna chhanginin, “Egypt-in final an lut a nih chuan a kir hman mahna, final hmaa fit hman chuan a kirleh mai ang chu,” a ti.
Zirtawpni khan Egyp-tian football association chuan an forward Salah chhawr leh theih an inbeisei thu tarlangin, an ramin quarter-final an luh chuan February ni 2-ah emaw ni 3-ah emaw African tournament khel chhunzawm tura a kirleh an beisei thu an lo sawi ve tawh bawk.
Vawisarih champion tawh Egypt-in Cup of Nations title an lak hnu-hnunber chu kum 2010 daih tawh kha niin, chu chu Salah international debut hma chiah kum niin, kum 2017 leh 2021 tournament-ah khan Pharoahs hi runners-up an lo ni tawh bawk.
Salah a danglam tawh – Fabregas
