Samagra Siksha kaltlanga Mizoram sawrkar hnuaia thawkte thla thum hlawh lak tawh loh chu sawrkar laipui atangin a lo thleng a; Thawhlehni khan state Finance department chuan an bank account-a thun turin a buaipui nghal.
The Aizawl Post thudawn danin, Samagra Siksha hnuaia thawkte hian kuminJune atang khan hlawh an la tawh loa, a nawrna atan kumin September 5 – Zirtirtute Ni chu badge dum bela hman an tum a; School Education minister ngenna avangin kaltlangpui loin, September 4 atanga chhiara chawlhkar khat chhung – September 10 thleng sawrkar ngaihchan leh nise, an ti a. An huntiam tawp ni tur, September 10 khan central atangin thla thum atana an hlawh tur hi State Finance account-ah an rawn thun a, Finance department hian buaipui nghal char charin, vawiin – September 11 hian thawktute account-ah hian thun hman an tum tih an sawi a ni.
Heti chung hian Samagra Siksha hnuaia thawktute intelkhawmna, Federation of Mizoram Samagra Siksha Employees (FEMSE) Council chuan Thawhlehni zan khan online meeting an nei a. An hlawh tur buaipui mek a nih avangin lungawilohna lantir lam chu an rel dawn loa, thu delhkilh erawh siam an tum tih FEMSE hruaitute chuan The Aizawl Post an hrilh.
An hlawh tur hi sawrkar laipui atanga rawn thleng mai tura state sawrkar hotuten an sawi laiin, a rawn thleng mai loa, a thua thleng anga sawi chu a takin tih puitlin a ni lo tih sawi a ni. An hlawh tur buaipui a nih chhunga thla khat hlawh tur Zirtirtute Ni pualin ‘present’ an ni dawn, tia School Education minister-in tawngkam a hmang chu pawi an tih thu an sawi a, hei hi a takin a hlawhtling ta lo zui tih an sawi bawk.
Samagra Siksha hnuaia thawkte hlawh tur state kutah awm tawh
