Juventus manager hlui Andrea Pirlo chuan kumin May thlaa Turkish Super Lig club Fatih Karagumruk a chhuahsan hnuah kum hnih chhung atan Serie B club Sampdoria enkawl turin inremna a ziak a, a management career-a senior team a enkawl pathumna tur a ni.
Kum 44 mi Pirlo hian kum 2020-21 chhunga Juve a enkawl zawk lai khan Turin club chu Coppa Italia leh Italian Super Cup-ah champion-pui bawk mah se Serie A lamah palina a nihpui phak chauh avangin an petchhuak a, Turkey lamah a kal ta a ni.
Season thar atanga a enkawl tur Sampdoria hi Italian Serie A season liamtaah khan division hniam zawkah an tla a; an tlak dan lah chu tla satliah pawh ni oin a mawngphah ni chungin season an khar.
Marco Giampaolo an ban hnuah nikum October thla khan beiseina nen ex-Inter midfielder Dejan Stankovic ruai mah se top flight-ah an inhamtang zo ta chuang lo a, kum 2011 hnu lama a vawikhatna atan season tharah hian Italy second tier lamah an khel dawn.
Player a nih laia kum 2006 World Cup-a Italy champion-puitu Pirlo hian club lamah Juventus leh AC Milan thuam inbel thinin, trophy tam tak a lak zingah Champions League title pahnih leh Serie A title paruk a tel a, kum 2017 khan inkhelh a bansan ta a ni.
Kum 2020 khan a club hlui Juventus chuan Under-23 team enkawl turin an ruai a, kar khat lek hnuah club thuneitute’n Maurizio Sarri an ban avangin first team enkawl turin an hlang chho zui ta a ni.
Sampdoria boss thar Pirlo
