Kum hnih chhung zet an khingpuite laka goal thun thei tawh lo San Marino chuan thawhleh zan khan Denmark lakah goal an thun ve ta mial a. Goal an thun ve mialna inkhelah hian an mikhual Denmark hneh lovin an tlawm tho thung.
Euro 2024 khel tur zawnnah San Marino hmachhawn tura Stadio Olimpico di Serravalle muala lenglut Denmark tan hian minute minute 42-naah Manchester United forward Rasmus Højlund chuan hmahruaina goal a thun. Hojlund goal thun hmanga hma an hruai hnuin minute 61-naah Alessandro Golinucci chuan San Marino tan goal thunin, an si phurh a sut. He goal hi kum hnih zet hnuah an thun leh hmasak ber a nih vangin San Marino hian an lawm hle nghe nghe. An di phurh an sut vangin phur hle mah se minute 70-naa Yussuf Poulsen tauh luh hmangin San Marino hi tlawm zawkah an tang leh ta tho thung.
San Marino hi an chak lo zawn rei ta khawp mai a, inkhel an hmachhawn hnuhnung vawi 84-ah vawi 83 zet tlawm zawkah an tang a. Vawi khat chu an khingpui Estonia nen an inhnehtawk ve teh mial. Estonia nen an inhnehtawk tum hi kum 2014 daih tawh kha a ni nghe nghe. Hemi hnu lamah hi chuan an la tlawm ta zat zat a. Vawi 83 zet tlawm zawn tawh chuan ngaia neih ve mai pawh awl ve tak tawh tur a ni.
San Marino lakah an chak vangin Denmark hi Group H-ah point 19 hmuin pahnihna an ni chhunzawm a. An group-a hmahruaitu Slovenia an hmachhawn zui leh dawn a. Slovenia an hneh a nih chuan Euro 2024 khel turin an tling chiang tawh ang a. Euro 2020 semi-finalist Denmark hi pahnihna ni chunga an tlang ta em lo a nih pawhin point an hmuh tam tawh em vangin play-off chu an khel phak ngei tura ngaih a ni a, an dinhmun a chhe hran lo.
Group H-ah hian mak tak maiin Finland in hma an hruai deuh reng a. Bul an tan that vangin Finland hian Euro 2024 an khelh phak mai a rinawm hman hial. Mah se, hun a kal hret a, inelna boruak a sang chho a, thil a danglam zo ta. A tir lama hmahruaitu Finland hi palinaah an tla thla dawrh tawh a, an tan play-off khelh phak ngawt pawh beisei ngam a har ta hial. Pahnihna Denmark leh pathumna Kazakhstan lehpel turin venneih tel an mamawh tawh.
San Marino in goal an thun ve mial
