Sangha khawnvartui rim nam Rohu
Lei rih lo turin FDA-in mipui a rawn
Tunhnaiah phai atanga sangha lakluh zingah khawnvartui rim nam a awm thu hriat a ni leh thin a, Health & Family Welfare hnuaia Food & Drugs Administration chuan bawhzui nghal zelin a chhan awmte chhui zui a ni a. Sangha zingah hian phai atanga sangha lakluh tlanglawn tak – Rohu bik chu khawnvartui rim nam deuh bika hriat a nih angin, hetiang sangha ei leh lei laka insum rih deuh mai turin mipui a rawn.
Thla hnih kalta vel atang khan phai atanga lakluh zingah khawnvartui rim nam a awm thu hi sawi a ni a. Heng sangha hring hi a rimchhiat mai lohna atan chemical engemaw hman vang a nih te rin na a awm avangin Food & Drugs Administration hian Aizawla laboratory-ah a endik a, chutiang chi, mihring taksa tana hlauhawm khawp a awm thu hriat a ni lo. Sample tam zawk hi sangha leitu leh a zuartuten an lo tih riral hman tawh avangin duh ang taka bawhzui theih a ni ta lo tih FDA hotute chuan an sawi a. Hemi bawhzuina atan hian mobile laboratory van an neih hmangin Mizorama lo lut tur sangha te pawh endik a ni.
Kar kalta lam khan sangha khawnvartui rim nam hi sawi a ni leh a, FDA hian sangha zawrhna hmun te endikin, sangha hmuh ang angte chu hralh loh tura hren (freezed) an ni a, test turin sample pawh lak zel a ni. Health Department Food Testing Laboratory-ah endikna changtlung zawk a la awm loh avangin sangha sample engemawzat chu Central Food Laboratory Kolkata-a endik tura thawn a ni.
Sangha zuartute pawh tuna sample thawnte result hriat a nih hma chuan hetiang sangha (Rohu) hi state pawn atanga lalut rih lo tura ngen leh hriattir an ni a. FDA hmuh phak loha kawl an awm a nih pawhin, mipui him zawkna atan hralh chhuak lo tura ngen an ni. ‘Khawnvartui rim nam sangha chu taksa tan a tha loang tih a hriat sa a. Rohu bika nam a nih avangin hetiang sangha hi lei loh leh ei insum rih a him ber ang,’ a ti bawk.
FDA hotute chuan sangha vawnna atana vur an dahkhang, an tui hmanah khawnvartui rim nam theihna a awm nge, thildang vang, tih te zau zawka chhui ngai a ni a. State pawn sangha lo kalna lam Food Safety hotute thlenga biak leh hriattir an ni tih an sawi.
Sangha khawnvartui rim nam Rohu Lei rih lo turin FDA-in mipui a rawn
