Luia nungcha leh sangha chi hrang hrangte an inthlah pun hun chhung a nih avangin sawrkar chuan October ni 10 atanga December ni 18 inkar (ni 68 chhung) chu Mizoram chhunga lui lian leh lui tê zawng zawngah heng lui sate- Nghalim, Nghadawl, Nghavang, Nghavawk, Nghahrah, Lengphar, Chakai, Chengkawl, Kaikuang etc. te man a khap a. Lui sate man khap hun chhunga dan bawhchhiate chu Mizoram Fisheries Act, 2002 Sect. 5 (4) hmangin thla khat chhung lung in tan, thla 3 chhung pawhsei theih emaw, Rs.5,000/ chawitir emaw, a pahnihin emaw hrem theih a ni.
Lui sanghate hi kan man dan phung a dik loh avangin inthlah pung tur pawh kan hnutchhiah lo a ni ber tawh a. Sangha man nan hian lui chhunga nungcha awm zawng zawng tihlum vek thei chi heng bleaching, chinai, geletine etc. te kan hman nasat avangin kan ram chhung lui dungah sangha leh nungcha dangte hmuh tur an awm ta mang lo a. A awm chhunte pawh inthlahpung hman lovin kan rut fai hneh thei hle a. Kan lui dungte hi han fang ila, lui chhunga sangha lêng vel hmuh tur pawh a awm tawh mang lo. Khaw bul hnai li tha lai deuh te khawtlang leh pawl ten humhalh kan intihhmuh tak avang hian lui nungchate hi an la mang lo hram hram mai niin a lang.
Tuna sawrkarin khapna thupek a han chhuah pawh hi, khapna hian zawm a hlawh em tih en thlithlai zui tur chuan sawrkar mi leh sate an indaih dawn hauh lo va, khaw tina village council leh khawtlang/NGO te nena tanrualna a pawimawh dawn a. Duhthusamah chuan an inthlahpun hun chhung bak, tlema an lo than len hun chhung tur huam deuhvin thla thum chhung tal hi chu insum theih ni se, chu chu lui sate hmanga eizawng thinte tan pawh hlawkna tha zawk a nih a rinawm.
Kan luidung sate hi kan humhalh thiam leh kan vai atana tha a ni a, kan vai atana tha tur kalphung tha hi tanrualna tel lo chuan a hlawhtling ngai dawn lo a. Chuvangin, sawrkar hian khapna dan a tihchhuah thinte hi hlawhtling turin khawtlang/NGO te nena thawhho dan tur fel tak duang thin se a duhawm hle a ni.
Sangha man khapna
