Sanghal thi, ASF a nih leh nih loh en tum

August ni 29 khan Lunglei district-a Bungtlang West khaw ramah sanghal ruang engemaw zat an hmu a, ASF vanga thi an ni em tih enfiah tum a ni.
Thu dawn danin sanghal ruang hi De lui kamah hmuh a ni a, a hmutuin a chhiar theih chin pawh 17 a tling. A rim chhia a, a bul hnaia awm pawh a hrehawm avangin a hmutu hian a chhiar chhunzawm lo a ni.
AH&Vety department lamin sanghal hi endik an tum a, African Swine Fever (ASF) vanga thi an nih leh nih loh enfiah an tum.
Sanghal hi a hmuna kal chilhin ‘sample’ lak an tum a, mahse sample lakna tlak loh khawpa a lo chhe tawh a nih chuan endik theih a ni lo mai thei tih thu dawn a ni.
Vawk hri leng mek ASF hi 2021-ah khan Mizoramah sanghal-in an kai ve tih finfiah a lo ni tawh a, Thenzawl rama Mat lui kama sanghal ruang chhar endik niin, ASF a ni tih finfiah a ni.
AH&vety department hotute chuan ASF hi vawk bakah sanghal leh phivawk te’n an vei ve thei tih an sawi a, vawk hri classical swine fever pawh sanghal-in an kai tih finfiah a lo ni tawh tih an sawi bawk.