Prince Harry leh a nupui Megan Markle chu an fate nen US atangin UK-ah an haw leh dawn ta. Prince Harry te chhungkua hian an lal chhungkaw mawhphurhna te kalsanin kum ruk kalta khan US-ah an pem a, a pem hnu hian a chhungte nen an inkarah pawh neuh neuh a awm zui a, tunah erawh US atangin haw an tintuah leh ta a ni.
Duke leh Duchess of Sussex te hian lal chhungkua an nihna anga an mawhphurhna te hlipin, anmani duhthu ngeiin California lam an pan a, UK a chhuahsan hnuah a tlansan tak a chhungte tana ngaihthlak nuam lo tak tak tawngkam dengkhawng tak tak te pawh a nei a, mahse, US-ah hian an beisei angin an nuamsa ta lo nge ni, tunah chuan a pianna ramah kir a tum leh ta a, lal chhungkaw lam hian engtiang chiahin nge an lo hmuah dawn tih puanzar a awm lo nain lal chhungkaw chenna pawnlamah an awm dawn niin report a awm a, chuvangin sebawngno nen chuan an lo hmuak dawn chiah lo te pawh a ni mah na!
Harry leh Megan te hian an fate Archie, kum 7 leh Lilibet, kum 5, te pawh UK-ah September thla atanga school an kaltir nghal tumin admission an tifel tawh a, chuvangin August thla chhung hi chuan UK hi an pan hman ngei a rinawm a, hetihrual hian Montecito, California-a an in chu an tiral dawn chuang lo a, Portugal lama an chawlh hmanna in pawh hralh tumna thawm a la awm chuang lo bawk a ni.
UK-ah hian lal chhungkaw mawhphurhna engmah pek let tumna a awm rih lo niin report a awm a, chuvangin Harry, kum 41, pawhin a mimal hna a thawk zui anga, UK-a charity a inhmanna WellChild leh Scotty’s Little Soldiers tan pawh a hun tam zawk a pe leh thei tawh ang a, Megan, kum 45, pawhin a sumdawnna, lifestyle brand As Ever chu a la kalpui zel dawn bawk a ni.
July thla khan Prince Harry te chhungkua hian UK an tlawh a, a pa, King Charles pawh an tlawh a, kum li chhunga an vawi khat inhmuhkhawmna a ni nghe nghe. July thlaa King Charles an tlawh hnu lawkah UK lamah haw leh hi an tintuah ta a ni.
Sap lal fapa tlanbo a haw leh dawn
