Sapthei ching tura thlante
hnenah an mamawh hlan
Horticulture department chuan MIDH Special Intervention hnuaia hmalakna in Ningani khan Pehlawnah sapthei chin an khuh hawng a. Department mithiamte leh Pehlawn leh a chhehvela sapthei ching tura thlante an tel.
Sapthei ching tura thlan bikte hi Horticulture department atangin tanpuina chi hrang hrang – sapthei tiak, a zamna tur hrui leh banril, organic leitha, NPK fertilizer, a natna enkawlna damdawi, wood vinegar, a kahna (sprayer), a tang tanna (secateur) pek an ni dawn a. A phun leh a thlawhfai leh a enkawl chu a chingtute thawh tur a ni.
Horticulture director CH Lalmuanpuia chuan, India state dangte neih ve loh, kan rama tha duh si saptheiah nasa taka hma lak an tum tih a sawi a. He programme hi lian zawkin sapthei that duhna district thlan bik – Khawzawl leh Champhai district lamah la kalpui zel tum a ni tih a sawi.
“Hnathawk peih chuan min cho rawh u, Horticulture department chu kan awm zel ang. Department-in a tih tur a rawn ti zel anga, in tih tur thahnemngai takin lo ti ula, kan ramin hma a sawn ang. Chalfilh tlangdung hi sapthei hmunah siam ang u,” a ti a. A dahthat dan tur leh sawngbawlna pawh sawrkarin a tih dan a ngaihtuah mek tih a sawi bawk.
Sapthei ching tura thlante atanga zawhna chhan a ni a, a hmunah hian sapthei chingtute tana scheme kentel sem nghal a ni. Pehlawn khaw daia sapthei chinna tur hmun thenkhat buatsaihte enkual a ni.
Sapthei ching tura thlantehnenah an mamawh hlan
