Land Revenue & Settlement department chuan an minister B Lalchhanzova hoin SASCI (Special Assistance to States for Capital Investment) hnuaia scheme kalpui dan tur an zir hoa, an department hnuaia officer zawng zawng an tel.
Minister chuan revenue hnuaia dan leh inkaihhruaina chi hrang hrang chu mipui tana awlsamna thlentu leh an ban phaka chhawpchhuah a nih theihnan a tul anga siamrem a tul tih a sawi a. “Dan awmsa kan hman mek hi khawilaiah hian nge siamthat zeuha mipui tana phurrit a chhawk zangkhai theih ang, tih ngaihtuah reng a tul a, Revenue lamah mithiam bik an nih avangin an thiamna hmang tangkaiin, ngaihtuahna seng ang u,” a ti.
Department officer-te chu tum (target) neia thawk turin a chah a. Hunbi tiam neia hmachhawp siam tura chahin, a tul anga vil reng an tum tih a sawi a ni. Sawrkarin dan kaltlanga mawhphurhna a pek chu phurrita ngai lo tur leh an thawh parzu mipuiin an tlan theih tura insangmar reng turin a fuih.
Workshop-ah hian thupui thlan bik neiin, Digital India Land Records Modernisation Programme chungchangah DILRMP GIS consultant Maria Lalramchuani’n presentation a pe a; Lailen Consulting Pvt. Ltd-in e-ram chungchang zirtirin, LR&S surveyor-I V Lalrindika’n ‘Generation of Unique Land Parcel Identification Number a zirtir a ni a. SASCI, DILRMP leh SVAMITA (Survey of Villages and Mapping with Improvised Technology in Village Areas) chungchang LR&S under secretary Remlalliana Hnamte chuan a sawi bawk.
SASCI hnuaia scheme kalpui dan zir
