Saudi Arabia-in WTA Finals thleng dawn
Kum tawp hmeichhe tennis hmawrbawkna WTA Finals chu kumin atanga chhiar tanin kum thum chhung Saudi Arabia-ah nghah a ni dawn a, prize money pawh kum kalta zawng zawng aia tam a ni dawn a, he kum thum chhung hian kumtin lawmmanah US dollar maktaduai 15.25m (£12.04m) semral thin a ni ang.
He tournament ngaihhlut hlawhah hian kum tawpa top eight singles player leh doubles team-ho an inel thin a, he tennis tournament hi Saudi Arabia ram chhunga tennis inelna lian ber tur a ni.
WTA chuan 2023 Finals pawh kha Saudi-ah hian a nghat hman teuh hle a, Cancun, Mexico lamah an sawn ta a ni.
Kumin Finals hi November ni 2-9 chhungin Riyadh khawpuia nghah tur a ni a; nikum pawh khan best men under 21-te inelna Next Gen ATP Finals pawh Saudi Arabia hian a lo thleng tawh a ni.
Saudi Arabia hi mihring dikna palzut kawngah te, hmeichhe rahbeh leh freedom of speech chhuhsak kawngahte a hmingchhe thin a, hei vang hian he rama tournament lian nghah hi infiammite leh human rights lam buaipuitute’n na takin an lo sawisel tawh thin a; kuminJanuary thla mai pawh khan Martina Navratilova leh Chris Evert pawhin he Arab lalrama WTA Tour flagship event nghah hi na taka dodalin, hmechhe tennis tan hnungtawlh zawnga kalna ti hialin an sawi.
Chu chu thil awmdan ni mah se oil vangin sum an ngah miau a, WTA lam pawhin an hnar thei ta chuang lo a, WTA chief executive Steve Simon pawhin Riyadh an thlan chhan a sawinaah he ramah hian change a thleng tawh a, women’s tennis an thlawp tlat tawh tia sawiin, WTA chuan kum 50 chuang daidanna bang lo pin tawh kha a thiat mek niin a sawi.
Tarlan tak angin, Arab ram hian sum an ngah a, an zarah prize money pawh kum 2025 leh 2026-ah chuan a hmaa US dollar maktaduai 15.5m (£12.24m) ni thin atang khan pound maktaduai 9 (£7.11m) zetin prize fund an tipung tawh dawn a ni.
Saudi Arabia-in WTA Finals thleng dawn
