Football-a hming hraw ber ber hui zawh vek tum ang hrima an sum bawm ui lo Saudi Arabia club-te chuan sum tam uchuak hlawh turin footballer uaithla lam leh vanglai hmang chho mekte thlengin an rut hmiah hmiah a; nikum December thlaa kum khat chhung leka US dollar maktaduai 200 chuang tehreng hlawh tura Al-Nassr leh Cris-tiano Ronaldo inremna khan khawvel barakhaih mah se tah khan Saudi Pro League club-te’n duhtawk an ngah lo a, khawvela player tha ber berte khawm zawh vek tumin tan an la khawh kal ta zel a ni.
Saudi Arabia lam mite’n heti tak maia khawvel player hming hraw leh tha ber ber an hruailuh zut zut chhan hi tuialhthei avanga an hausakna zozai hman ngaihna an hriat loh vang nge an mit itzawng an zawnna mai ni ang tih leh zawhna tam tak a piang thei mai thei a, he boruakah hian Saudi Pro League chief operating officer Carlo Nohra chuan an dinna a sawifiah.
Reuters-in an kawmnaah Nohra hian tum bulfuk tak nei chunga top player an sengluh kal mek thu sawiin, Saudi Pro League chu khawvela league tha berte zinga teltir ngei an tum thu leh chu chu an long-term policy a nih thu a sawi.
Carlo Nohra hian football atchilh ram an nih thu tarlang tel chungin Zirtawpnia season thar tan turah khawvela footballer hming hraw ber ber an kawl thup tawh avangin stadium tinah fans an chim hum hum dawn tih a sawilang tel.
Saudi club-te hian Paris St-Germain atanga Kylian Mbappe an sengluh hma hauh pawhin season liamta tawp hnu mai atanga Europe club lian ber ber-te atanga player challang an rawk tawhte manah euro maktaduai 400 (USD 439 million) chuang an thehchhuak tawh a, an sum hmanna hraw zualte chu Real Madrid atanga Ballon d’Or winner Karim Benzema an lakluhna man te, Liverpool captain Jordan Henderson an leina leh treble winner Riyad Mahrez mana Manchester City an vulhnate kha a ni.
Al-Nassr leh Ronaldo inkuah hnu khan chawl loin Saudi club-te hian big name zawn hna an la kalpui chho ta zel a; soccer website lar tak Transfermarkt tarlan danin tun nipui insuan hun laiin Saudi League hi khawvela sum seng hnem pangana ni pha tawhin, Spain LaLiga chungah an awm hial tawh a ni.
Media report hrang hranga kan hmuh angin Saudi Arabia sawrkar pawhin an top flight hmasawnna tur hian nasa takin tan a khawh a, Vision 2030 an tih project hnuaiah an ram club-te sum lama tanpui turin US dollar vaibelchhe 17 chuang a dah hial a ni!
September ni 7 khi Saudi Arabia rama nipui transfer tukverh hawn mek tawp hun ni tawhin, he mi hma hian player langsar engngemawzat an sengluh leh ngei rin a ni.
Saudi football rawn lar thut chhan engnge?
