Sawhthing MT 10 thawnchhuak
Sailam leh Chamring khua amite sawhthing thar, metric tonne 10 chu Kolkata-a hralh turin thawnchhuah a ni.
Mizoram State Rural Livelihoods Mission (MzSRLM) hnuaia din Ropuiliani Women Farmer Producer Company Limited tharchhuah sawhthing metric ton 10 hi, inremna an lo siampui tawh angin Reliance Retail Limited chuan state pawna hralh dan a dap sak dawn a. He thawhdunna ang hian a tum khatna atan Sailam leh Chamring khuaa company shareholders 55 hnen atangin company-in a leikhawm a, Reliance Retail Ltd hnenah hralh chhawng lehin Kolkata-a phurhthlak tur a ni.
Zirtawpni khan sawhthing phurh thlak tur hi chhuahpui a ni a. Vailiamtu adviser to chief minister (Implementation of Handholding Policy) Dr KC Lalmalsawmzauva chuan sawrkar flagship programme hnuaiah sawhthing tam zawk thar zel turin hma lak mek a ni tih a sawi a. Reliance Retail Ltd nena thawhdunna chu kuthnathawktute leh company tan hlawkna tha tak a nih a beisei thu a sawi.
Mizoram sawrkarin thlai pali lei tur a thlante theihtawp chhuahin a market lamah hma an la a, zaa za hlawhtling nghal lo mah se, nasa takin hma an sawn tih a sawi. Bana Kaih hnuaia sawrkar thil tum ber chu kuthnathawktute chawikan a ni a, chumi atan chuan tharchhuah hralhna turin market ecosystem mumal tak leh awmze nei siam a ngai tih a sawi bawk.
“Sawhthing lei turten a hlawma leina mai tur an hre thin loa, sawhthing thar teuh siin Mizoram khaw hrang hrangah an vahkual a ngai thin. Sawrkar chuan district hrang hrangah a hralhna hmunpui Secondary Collection Centre 66 a ruahman a. February 20 atang hian heng Secondary Collection Centre cum Auction Centre-ah hian sawhthing auction runpui (Rs.50 atanga tan tur) neih a ni ang. Kum 5 a vei meuh chuan heng SCC hi mumal zawka a kal theih tawh kan beisei,” adviser to CM hian a ti.
Sawhthing MT 10 thawnchhuak
