Mizoram sorkarin sawhthing a lei mek a, May ni 20 thlengin sorkarin quintal 1,14,622.82 a lei tawh tia chhinchhiah a ni.
Sorkarin sawhthing lei leh hralh buaipui tura a din Mizoram Agricultural Marketing Board (MAMB) chhinchhiah danin, sawhthing lei nan hian cheng vaibelchhe 58 vel pek chhuah a ni tawh a, a hralhna atangin MAMB account-ah cheng vaibelchhe 6.64 vel a lut tawh.
MAMB lam atanga thu dawn danin, sawhthing lei sa hi hmun khat atanga hralh lovin Secondary Collection Centre hrang hrangah an hralh a, chuta sum hmuh tawh zawng zawng chu cheng vaibelchhe 6.64 ai chuan a tam ang; cheng vaibelchhe 6.64 hi chu MAMB account-a lut tawh chin a ni.
MAMB sawhthing lei sa hi mi hrang hrangin an lei a, a tam zawk chu hnam dang an ni. An leina hmun azirin sawhthing man hi a inang lo.
Tunlai hian kg-ah Rs 14 leh Rs 15 a ni tlangpui a, Rs 20 a kai lo. Organic certificate nei erawh Rs 30-in an hralh a, mahse organic certificate nei hi tlem azawng chauh an awm.
Sawhthing hi a neitute hnen atangin kg-ah Rs 50-in sorkarin a lei anga ngaih a ni a, mahse a hmun azirin a rate hi a inang lo, Rs 50 tling lova hralh an awm teuh. Chu chu sorkarin a hralh chhawng leh a ni.
Sawhthing hi sorkar hian February ni 20-ah a lei tan a, March ni 20 hnuah chawlh lailawk a ni. Mahse chawlh lailawk lai pawh hian tam tham ni lem lova lei a awm reng tho, MAMB lam chuan an ti a, April ni 21 atangin a lei hna hi an thawk leh.
Sawhthing quintal nuai 1.14 lei tawh
