Kuminah Mizoram sorkarin a thartute hnen atangin sawhthing quintal nuai hnih chuang a lei tawh a, sawhthing chawh hun hi a tawp tawhah ngaih a ni.
Mizoram sorkarin Mizoram Agricultural Marketing Board (MAMB) a din a, anni hi sawhthing lei hna thawktute an ni. MAMB chhinchhiah danin, June ni 20 thleng khan sawhthing hi kg 2,14,42,873.8 an lei tawh a, chu chu quintal 2,14,428.738 a ni.
Sawhthing hi February ni 20-ah an lei tan a, March ni 20-ah an chawl. MAMB hotute sawi danin, tam thama lei an chawl a, tlem tlema lei chu a awm tho. Chumi hnu April ni 21-ah an tan leh a ni.
Sawhthing hi May vel thleng an cho tlangpui a, chumi hnua chawh pawh a awm tho. MAMB lam pawhin June ni 15 thlengin primary society-te tan Secondary Collection Centre hnena hralh hun an hawng a ni. June ni 30 thlengin Secondary Collection Centre te tan invoice tihfel hun an hawng.
MAMB-in sawhthing an lei hi mi dang hnenah an hralh chhawng leh a, a tam zawk chu hnam dang an ni tih thu dawn a ni. A tir lamah khan kg-ah Rs 20 velin a lei chhawngtute hian an lei tlangpui a, Rs 18 leh Rs 19-a lei te leh Rs 24-a leite pawh an awm. Chumi hnuah a man hi a tlahniam a, kg-ah Rs 15 te’n MAMB hnen atang hian an lei; Rs 18 leh Rs 19-a leite pawh an awm a, Rs 20 a kai zui meuh lo tih thu dawn a ni.
Sawhthing lei zat
February-ah Kg 2528960
March-ah Kg 4026300
April-ah Kg 2677275
May-ah Kg 5579481
June-ah Kg 6630857.8
Total Kg 2,14,42,873.8
Sawhthing quintal nuai 2 chuang lei tawh
