Tluangtea Hnamte
Zote ‘S’
Ni 2 February, 2026 atanga Sawhthing lei tan a tum thu Sorkarin a puan laiin, March ni 4, 2026 (Ningani) thleng hian sorkarin tih tham Sawhthing a la lei tan tak tak lo.
Meichher News ni 4 March, 2026 in a tarlan danin Sawhthing hi February ni 9 atang khan lei tan a ni a. Tun thla ni 2, (Thawhtanni) thleng khan Secondary Colection Centre (SCC) 64 zinga, Secondary Collection Centre(SCC)10-atangin Support Price system-in lei a nih tawh. Hetiang a nih chuan sawhthing la lei miah lohna SCC 54 a la awm tihna a ni a, a nihna takah chuan sorkar hian kuminah hian sawhthing hi a la lei tan tak tak lo a tih theih awm e.
Tun thlenga Sawhthing a la lei loh chhanah Sorkarin chhuanlam a siam chhan lian tak chu; Mizoram Sawhthing hlutna vawn him a duh vang a ni tih hi a ni. Sorkarin Sawhthing rate (Siliguri Mandi rate) zir chunga reserve rate a siam 1kg Rs 34/- a buyer in an lei hian Mizoram atanga Siliguri thlenga Motor phurhna man (Rs 7) bakah Sawhthing chhe deuh paih ngai lo awm pawh ni se, 1 kg-ah Rs 30-35/-vel an la hlep phak avangin, tlawm lutuka Sawhthing kan hralh hian kan ram Sawhthing hlutna hi kan tihniam vek thei a. Chuvang chuan reserve rate hi tlawm lutuka kan siam hi a tha lo a ni tih hi a ni. A dikna chen pawh a awm ngei ang. Mahse, hetih rual hian Sawhthing hlutna ven him a tum luatah hian, kumina kuthnathawktute thawh hah hlutna hi a tichhe vek thei a ni tih hi kan sorkar hian ngaihtuahnaah nei tel thei se a duhawm hle ang.
Sawhthing hralh chungchangah kher hi chuan, Vai fin kan khalh lo a ni tih hi kan sorkar lam hian an hriat hi a tul. Nikum (2025) Nov-Jan Thla khan Vai ho hian 1kg Rs 22-32 khan an buk char char a. Sorkarin ni 2 February, 2026 atanga sawhthing lei tan a tum thu a puan chhuah rual rual khan Sawhthing rate mumal a awm lo va. Vai ho lah the-hmeh ang maiin an reh zui nghal hmak a nih kha!
He mi awmzia chu Sorkarin sawhthing a lei dawn a, a lei lo a nih pawhin Support Price a pe dawn a ni tih hi Vai sumdawngho hian an hriat khiau avangin, sorkar chet hun hi an nghak ta hmak mai a ni. Siliguri Mandi rate chu eng zat pawh ni se, buyer(vaiho) chezia leh sukthlek dan atang hian 1 kg Rs 30/- aia tova lei hi an tum lo bur niin a lang a. Sorkar lam lahin a tlem thei ang ber Price Support pek an tum ve tlat bawk si; Vai(buyer) leh sorkar inkarah kuthnathawktute nekchepa awmin kan mangang tlang ta hle a nih ber mai hi!
Siliguri Mandi rate chu eng zat pawh ni se, Buyer (Vaiho) in reserve rate-a an chhan duh miau loh va, Siliguri-a zuk hralh tur mizo Buyer lian kan awm a nih bawk si loh chuan, Sorkar hian ngaihtuahna thara sen hi a hunin a tul takzet tawh a ni. Sawhthing neitute manganna hi mangan thlak tak a ni tawh!
“Sorkar thu hi lo nghak hram hram ula, lo la cho rih lo phawt teh u” tia, hapta 3 dawn kan innghah hnua kuthnathawktute harsatna tawh dan hi kan sorkar hian a hriatpui theih nan heti hian ka han tar chhuak ang e;
1. Kum dangah kha chuan March-May Thlaa Sawhthing kan chawh hian Sawhthing hi a la hriselin a hring tha em em thin kha a ni a. Kuminah hi chuan khaw lum leh Ni sa ta lutuk avang hian Ni kanga sawngthing linte chu a ni telin an sawng/vuai chak em em a. Hetiang ang zel a nih hi chuan March thla a ral meuh hi chuan Ni kanga lin Sawhthingte hi chu chawh tlak a awm meuh tawh lo vang! Kan Sawhthing chinna hmun hi ni hmu lo(dam) vekte chu ni se, a zia zia pawh a la awm tur hi a nia! Heti chunga tun thlenga, “Lo la nghak hram hram rawh u” in tih reng ringawt mai hi chu inhmuhsitna lam rawng a kai hial emaw chu aw tih mai hi awl zate a ni.
2. Chawlhkar leh deuh mai khi Sorkarin lo hal hun atana a ni tiam(15 March) a ni tawh a. Lo hal a nih chuan hna tau tetin, Thlam sak, Sawhthing chi siam leh linte a inzui zur zut tawh a. Chung karah chuan lo theih lova Sawhthing chawh a lo ngai bawk dawn nen, a buaithlak dan tur zia hi ‘buaithlak’ tih hian a hrilhfiah phak zo meuh lo a ni e.
3. Khaw tina Sawhthing chinna hmun tam ber(90%) hi chu link road/kacha road thal chhung chauha lirtheiin load a lak theihna ngawr ngawr a ni tlangpui deuh vek a, ruahthimpui thlen hma kum a nihte phei chuan Sawhthing phurh chhuahte chu chuti hlauh chu a ni mai! Chuvangin, khaw tam zawkte tan chuan Sawhthing chawh hi muang chan ngawt theih a ni lo. Ruahtui tlak hma Motor a tlan theih chhung ngeia an inchawh zawh hman ngei ngei hi a ngai a ni.
4. Secondary Collection Centre(SCC) tam zawkah tun thlenga Sorkarin sawhthing a la lei loh avang hian, hmun hrang hranga Sawhthing chingtute an mangang tawh hle tih hi thu dik a ni. Kan sawi tak anga ni tin Sawhthing vuai leh sawng chak lutuk avang hian sorkar lei theih hun hun tur nghah a, man man zawka hralhte chu thlahlel ve hle mah se nghak thei niin an inhre lo va, hralhna remchang an hmuh ang anga hralh mai turin an cho lo thei ta lo a ni. Khaw thenkhatte phei chuan Sorkarin a lei tak tak hunah meuh chuan, hralh tur tihtham an nei meuh tawh lo vang!
Kan Sorkar hian sawhthing hi a lei vat lo a nih chuan, heng hi Sawhthing neitu ten harsatna an tawh mek leh an la hmachhawn turte chu a ni.
Tuna reserve rate 1kg Rs 34/- hi chuan khawi SCC atang mahin, Sawhthing hi hralh chhuah a beiseiawm loh. Chuvangin tuna khaw thenkhat ten 1kg Rs 25-28 a an buktir mek lai hian, Support Price hi kalpui turin kan sorkar hi ka ngen takzet a ni e.
Tunah hian hmun hrang hranga Sawhthing chingtute mangangin an remhriat dan dana Sawhthing hralh dan tur ngaihtuahin ngaihtuahna an seng nasa hle a. Khaw thenahte chuan, tuna vaihoin an lei ngamna 1 kg Rs 25-27/- a hralh hmiah hmiah a, sorkarin reserve rate a siam Rs 34/- a tlin lohna Rs 8-6 chana sorkara support price hmu tura hralh dan tur thlengin ngaihtuahna an seng ta hial mai. Hetiang hi a thleng a nih chuan kuthnathawktute tana budget ‘DAHTU’ sorkar tan hian a tluka mualphona dang hi a awm leh thei tawh chuang awm lo ve! Chutiang ni chu a lo thlen loh nan kan sorkar hian ruahmannthar han siam hram teh se.
Chu ti ni lo va, “Lo la cho rih suh u”, tia kan inngen kar tin reng ringawt a nih hi chuan, a nun tihlim thintu a fanu mal neih chhun hnena Jepthan, “Ka fanu, mi timangangtu zinga mi i ni ta:” a tih ang mai khan, kan innghahna leh kan hma lam hun atana beiseina min siamtu, kan nun tihlim em em thintu kan Sawhthingte hi min timangangtute zinga mi a ni ve palh hlauh mai tih pawh hi ka hlau hlel lo ve!