Sawizawm hlawh Messi leh Lamine

Rawlthar kum 16 mi lek ni chungin Lamine Yamal chuan France lakah goal khungin Spain chu European Championship kal mekah final a luhpui a, Barcelona lamah hriat hlawh tawh tho mah se Euro-a goal khung thei naupangber a rawn nih chhoh tak hnu hian Spain mai ni lo, Europe mai pawh ni lo, khawvel football-ah a hming a langsar nghal a, legend thar piang ang maiin media lamin an chhuah a, nausen a nih laia Barca legend Lionel Messi nena an thlalakdun pawh a rawn lar thar nghal hluai a, Argentina superstar leh Spaniard mihang rawlthar hian sawizawm an hlawh nghal chuai chuai.
Messi leh Yamal-te thlalak hian tunhma lam kha chu an ngaihven leh thlir a hlawh hran lo a, Camp Nou club-in a thlawna a thawhpui ngar ngar thin Unicef programme pakhat behchhanin Barcelona ngulpui lianberte zinga pakhatin mihang naupang thla a lakpui kha a ni mai thin a, mahse, karliamtaa Yamal-a pain Instagram lama thlalak a rawn phochhuah thar leh takah chuan ngaihven a hlawh a, thlalak hrulah ‘The beginning of two legends’ tihte dah a lo ni bawk nen Europe leh South America khawmualpuia an mipa football inelna lian ber ve ve kal lai ni mah se tunlai football khawvela thlalak lar ber a rawn ni chho thei hial a ni.
Mihang naupang Lamine Yamal leh Lionel Messi-te thlalakdun hun lai hi kum 2007 daih tawh kha niin, Messi pawh a la tuai zek zawk hle a; charity calendar photoshoot atan Camp Nou-ah thla hi lak niin, chutih lai chuan Messi pawh kum 20 mi chauh a la ni a, football tualcharah erawh hming a chher tan viau tawh a ni.
UN hnuaia naupangte ngaihtuah tur bika pawl din Unicef lamin lottery an siam a, chu lottery-a naupang vannei chuan Barcelona player Lionel Messi thla an lakpui ang a, an thlalak chu charity calendar-a tarchhuah tur a ni.
Kha tih laia an thla laksaktu freelance photographer Joan Monfort khan a thla lak sak mihang nausen leh a lakpuitu kha international football-a mi chungchuang bik an la rawn ni thei dawn tih a ngaihtuah thui vak bik lo mai thei a, Argentine bik kha chu a talent hmuh tur awm tawh a ni a, nausen hmalam hun erawh kha chu suangtuah tham harsa a ti ve mai thei!
Kum 17 pawh a liam tlin main rawlthar rawn ni ta Lamine Yamal chu khawvela footballer piang tawh zawng zawng zinga ropuibera ngaitu ngah ber ni hial tura ngaih Messi nen khaikhin a ni tan der tawh a, Barcelona inzirna hmunpui La Masia pum chhuak ve ve an nihna leh Barca player pawimawh an nihna hian sawizawm a hlawh zual bawk awm e.
Thawhlehni zan Euro 2024 semi-final match-a France an hnehna game-ah kum 16 leh ni 362-a upa ni chungin Yamal chuan goal a khung a, he tournament history-a goal thun thei naupangber rawn nih chhoh takah chuan Associated Press tana thla latu Joan Monfort pawhin Barcelona mi langsar pahnih rawn ni tate thla a laksak lai boruak a rawn sawichhuak ve ta a ni.
Monfort chuan, “Kha lottery kha Lamine chhungkaw chenna Mataro khaw lama Unicef lamin an huaihawt niin, lawmman dawngtu naupang vannei bik tan Camp Nou-ah Barca player tu emaw nen thla lak tur tih a ni a, Lamine chhungkua kha an vannei ta a ni.
“An inremna ang chuan kalpui niin, khatih lai khan Messi kha player zakzum lam a ni a, locker room atangin a lo chhuak a, inthlakna pindan danga plastic bualthlenga tui khat pam mai leh naute a hmuh chuan a rilru pawh a buai ve deuh nak hman niin a lang a, a tirah phei kha chuan engtia nausen kha han pawm leh chelh vel tur nge tih pawh a hrethiam mai lo,” tiin thlalak lai boruak a sawi.
Kha photoshoot-ah khan Yamal-a nu pawh a lang tel a; hun a lo kal lehhret a, chu mihang naute chu Messi inzirchhuahna La Masia-ah ziahluh niin, he hmuna ei a tlin rualin Barcelona tan kum naupang tein a rawn khel chho a, he club senior team tana starting eleven luah thei naupangber a nih hnu lawkah Catalan team chanchina goal khungtu naiupangber a rawn ni leh a, Spanish league pumpuia goalscorer naupangber a ni bawk.
Euro 2024 a herchhuak a, Spain innghahna lian rawnni chhoin, Euro history-ah goal khungtu naupangber ni chungin kum 16 mi lek ni chunga European champion ni thei dinhmunah a ding zui ta mek a ni.
Argentina nena khaikhin an nih chungchangah Lamine Yamal a tawngchhuak a, “Messi nena sawizawm maw? Tihsa loh loh. Chanchinbu lamin an tih thin danin Messi nena hmehbel tur player an zawnna boruak mai mai a ni. He thu rawn irhchhuak hian min tibuai deuh hial mai.
“Barcelona-a a training lai kha ka thlir thin a, ka duhthusam tipuitlinga first team-a khelh leh Messi bula khelh kha ka mangphan a ni thin. Chu mumang ram erawh, vanduaithlaktakin, a tak a chang zo a lo.
“Messi hi ka idol a ni a, ani nena khaikhin tham ka ni lo a, a sualchhuah zatve tal erawh hlawhchhuah ve ka beisei ngam tawk emaw chauh a ni a; football chanchina thiam ber a nihna hi rinhlelh tur a awm lo,” a ti.