Sawrkar hmasa lamin sum an puk khan, a hmanna tur mipui hrilh loin, sum an puk vak vak tiin ZPM lamin an sawi thin a. An sawrkar hnu ah hmasawnna hna thawh nana hmanna hmuh tur awm si loa sum an puk chhan chu sawifiah turin an duh tih MNF hruaitu Er K Lalsawmvela chuan a sawi.
Thawhtannia MNF office-a inkhawmah MNF general secretary Er K Lalsawmvela chuan, sawrkar hmasa in sum an puk khan, a hmanna tur mipui hrilh si loin, mipui min dahkhamin sum an puk vak vak a, leiba an ngah lutuk, tiin ZPM-in an sawi thin a. Ninevi Challenge an tih, Lammualah, “Hnam tam tak in puktir anga, nangni chuan in puk ve loang” tih thu tap aw tuauin ZPM hotupa khan a sawi a, an sawrkar tirh December 2023 atangin kumin April tih loh chu thlatin OMB hmangin an puk a, chutianga an puk chu June thleng khan cheng vaibelchhe 602 niin, ways & means advance hmangin vbch. 1280 vel an puk bawk a; thla 6 chhunga an puk belhkhawm chu vbch. 1859.94 a tling der tawh tih a sawi.
Sum puk chhan mipui hnenah an puangzar ngai loa, hetianga an kal zel chuan kum 5 chhung chuan vbch. 18600 a tling dawn tihna a ni. Hetianga sum puk vak vaka development awm leh si lo hi a chhan sawifiah se, a duh thu a sawi bawk.
Chhiah an tih pun loh tur thu an sawi laiin, MNF sawrkarin petrol leh diesel man litre-ah Rs.7 a a tih hniam tawh, tun sawrkarin 2% a a tih pun vanga lirthei chuan man leh thil phurh man a to palha mipui min nghawng dan tur chu an party hotuten an sawi tawh a. Hei bakan hian in hmun leh ram inhralh leh hming thlak dawna stamp duty nasa takin an tipung bawk tih a sawi.
“Tuna kan sawrkar hruaitu Pu Lalduhoma leh a hote hian inthlan hma khan thu tam tak sawiin, nasa takin an intiam a. MNF leh Congress-in kum 36 chhung min hruai tawh a, heti zawng hi kan ni, tiin, sawrkar hmasate kha engmah ti lo, chhe lailet derin an sawi a. Thil kalphung pangngaia an tih theih loh tawp tur kan hriatreng pawh ti tura intiamin, kalphung thar, MNF ni lo, Congress ni lo sawrkar min enchhin rawh u, tiin, serafim state din tur hial angin an intiam a. Mah se, an insawi loh dan ang zelin an awm,” Er K Lalsawmvela hian a ti.
Sawrkar hmasa an phut angin, sum puk chhan sawifiah ve se – Er K Lalsawmvela
