Sawrkar hnathawk lak kawngah dan ang taka kalpui leh a tling ngei chauh lak chu an thupui a ni a. Mipui sawrkar an nih angin tumah thlei bik neih an phal lo tih chief minister Lalduhoma chuan a sawi.
Mizoram Police Service Association (MPSA) conference vawi 15-na Zirtawpnia neih a hmanpuinaah chief minister chuan Mizoram Police constable recruitment neih tawh zawng zawnga belhchian dawl ber leh fair ber tia sawi ngamin tunnaiah constable an la a, police 259 lak thar an ni tih a sawi.
“Sawrkar hnathawk lak kawngah dan ang taka kalpui leh a tling ngei chauh lak hi kan thupui a ni. Mipui sawrkar kan nih angin tumah thlei bik neih kan phal lo. Constable lak kawnga thawktu in ni a, lawmthu ka sawi a ni,” a ti.
An sawrkar phat atangin eiruk do lam an bei nghal chat a. Lok Ayukta an thuamtha a, Inquiry Wing hawn belhin MPS officer deputation post pathum – chief inquiry officer, inquiry officer leh deputy superintendent of Police an siam a. MPS officer pathum an awm belh hian hma an sawn ngei turah an ngai tih a sawi.
Police zingah service laia thi an ngah thin chu a vei tih Lalduhoma hian sawiin, “An thih chhan tam ber lah nun inthlahdah kaihhnawih natna a ni deuh zel. MPS officer zingah chuan in awm lo turah ka ngai a, in naute enkawl kawngah fimkhur rawh u. Officer-ten in service leh in hamthatna ringawt in ngaihtuah a, in hnuaia thawkte hamthatna in ngaihthah leh si hian dik kan ti lo. Kan staff-ten beisei an rawn neihin a lo dang bettu ni loin a tanpuitu kan ni thin tur a ni,” a ti.
Tunhnaia Assam nena ramria thil thleng chu a hriat veleh Assam chief minister nen an inbe nghal tih chief minister hian a sawi a. Tumahin harsatna siam zawnga engmah tih rih lo (status quo) tura an lo sawidun tawh chu tha taka kenkawh an remti dun tih a sawi.
MPSA president Zosangliana chuan sawrkarin nikumah police quarters sakna atan cheng vaibelchhe 50 a pe a, MPS thar lak a ni a, kuminah pawh MPS 8 lak mek a ni tih a sawi. An TA/DA leh an hamthatna dang tam tak pe chhuak a, rifle allowance an tihpun sak, constable 259 an lak thar sak, tunah sub inspector 25 leh fourth grade 6 lak an phalsak avangte in sawrkar chungah an lawm hle tih a sawi a ni. MPSA member hi 139 an awm mek.
CM thusawi dang:
8 MPSA chu ruihhlo do leh state ralmuang bera chhal theiha Mizoram a awm theihna tura an hnathawh tinrengah lawmthu a hrilh a. Ruihhlo chu sex dawta HIV thehdarhna hmanraw langsar ber a ni, tiin, ruihhlo do beihpui kan thlak hian HIV darh zel tur kan veng nghal a, taksa leh thlarau chhandam hna kan thawk a ni.
8 Police officer chuan ram dan, dan thar leh dan siamthat awm thar hriat bel tur a ni a. Dan chu kan hmanraw tangkai, kan silai aia kan hman rim zawk a ni. Misualten min finkhalh tur a ni loa, dan hriat kawngah chauh ni lo, suahsuahna thar lo chhuak zelah pawh misualten min hmakhalh tur a ni lo.
8 Ram nuam tehna bulthum chu a chhunga cheng mipui zalenna leh ralmuannaah a ni. Ram hmasawnna hnathawh tinreng hi remna leh muanna boruak hnuaiah chauh tihpuitlin theih a ni a. India rama state ralmuang bera kan inchhal ngam chhan chu police-te thawh that thin vang a ni. He hnathawh tha hi chhawmnung zel ang u.
Sawrkar hna laknaah a tling ngei chauh lak hi kan thupui: Chief Minister
