Mizoram state sawrkar hnuaia hnathawkte chuan sawrkarin health care scheme thar a ruahmanah telh ve rih loh phawt an duh tih an sawi. Mizoram sawrkar hnathawkte inzawmkhawmna – Federation of Mizoram Govt. Employees & Workers (FMGE&W) chuan hemi chungchang hi an ngaihtuah a. Sawrkar hnathawk health facility – Central Services (Medical Attendance) Rules 1944 anga kalpui thin chu, tun sawrkarin revised health care scheme hmanga kalpui a tum danah thil chiang lo tam tak a la awm, tiin, heng hi chinfel a nih hma chuan sawrkar hnathawkte telh ve rih lo se an duh tih an sawi.
Mizoram sawrkarin Pay Commission din thar tura thutlukna a siam chu ram tan thil tha ber nia a lan loh thu FMGE&W hian sawiin, sawrkar hnathawk lak thar (new recruits) tan chauha siam pawh nise, technically-in thil remchang lo a awm bakah dan mit atang pawhin him lo awm thei nia hriat a nih vangin, state pay hran siam loa tuna an kal dan anga kal an duh tih sawrkarah thlen an tum a ni.
Sawrkar hnathawkte dearness allowance chungchang Council of Ministers ngaihtuah zel tura tih chu ennawn a, tunhmaa kal dan pangngaia kal tur sawrkar an lo ngen tawh chu ngen leh nise, an ti a. Dearness allowance chu an pay rules ang chuan central government rate ang zela kal tur an nih lai a, Council of Ministers thukhawmin 1.4.2025 atanga 2% chauha tihpun tura a rel chu lungawithlak loh an ti a. Mizoram sawrkarin Year of Consolidation a hman hre chungin, pay rules anga central govt rate pawh phut ngam loin, 1.7.2024 atangin 4% tala tihsan sak turin sawrkarah ngen nise, an ti bawk.
The Aizawl Post-in a zawhchiannaah FMGE&W hruaitute chuan, sawrkarin health care scheme thar a ruahmanah hian sawrkarin rate a siam hi private hospital-ten an pawm thei dawn em, tih a la chian loh bakah private damdawi inte hian cashless facility hi an duh dawn em tih a la chiang loa, hei vang hian tel ve rih loh phawt an duh tih an sawi a ni.
Dearness allowance chungchang hi tunhma zawngin Finance department-in a changtu minister/ chief minister hoin an ngaihtuah mai thin a; sawrkar thar a pian hnu ah Council of Ministers ngaihtuah tura tih a ni ta daih chu, a nawrtu an awm vanga tih a nih theih thu an sawi. A pek dan turah dan leh notification awmsa vek, policy thil pawh ni lo a ni tih sawiin, “Rules awm lo emaw, kaihhruaina awm sa thlak thleng ngai thil a nih chuan cabinet decision lakna awm tak a ni anga, cabinet thuthlukna lak kher ngai loin rules a awmsa vek a ni,” thudawnna chuan a ti.
Thudawnna dang sawi danin, Mizoram sawrkar hnathawkte DA tihpun chungchangah kumin January-a Council of Ministers thutkhawmah cabinet approval zel a ngai tawh ang, tih a ni a. Hetah hian deputation-a Mizoram sawrkar hnuaia thawk central service leh All India service ho chuan central-a tihpun a nih rualin a pungin an la ve nghal zel lawi si tih a sawi a ni.
FMGE&W hruaitute hian vawiin – August 26 hian finance changtu chief minister hmu in heng thil hi thlenin an sawipui dawn nia sawi a ni.
Sawrkar hnathawkten health care scheme thar pawm ve lo
