Ramin hmasawnna kawng a zawh theih nan sawrkar inrelbawlna hautak lutuk tihreh hmasak a ngai tih PC president Vanlalruata chuan a sawi.
PC president hian ramin hma a sawn tak tak na turin kan ram inrelbawl dan siamthat a, sawrkar inenkawl leh inrelbawlna hautak lutuk tihreh a ngai tih a sawi a. Hemi atan hian sawrkar inrelbawl dan siamthat (administrative reform) leh sum enkawl dan siamthat (fiscal reform) a ngaih bakah ram hruaituten an eiruk loh a, eiru an hrem a tul tih a sawi.
“Eng party pawh sawrkar se kan ram an hmangaih a nih chuan heng hi tih theih a ni a. Keini sawrkar ila kan ti ngei ang,” a ti.
Ram hausa, hnam hausa nih theih nana hma lak chu sawrkar mawhphurhna a nih angin, chumi nih theih nan industry din kawnga hmasawnna (industrial revolution) thlen leh kan ram chu India, Myanmar leh Bangladesh mai nilo, South East Asia ramte insumdawn tawnna hmunpui, Indo- Myanmar -Bangladesh (with ASEAN) Trade Hub-a insiam chu eng party pawh sawrkar se, ram leh hnam dinchhuah tak takna an duh a nih chuan thil tih theih a ni tih a sawi a. PC sawrkar se an tih ngei tur a ni tih a sawi.
“Kan ramin hma a sawn a, kan ram leh hnam a dinchhuahna tura heng thil hi ti ngei turin sawrkar thar lo ding tur hi kan beiseiin kan ngen lawk a. Heng tihhlawhtlin nan hian kan theih ang angin hma kan la dawn a ni,” Vanlalruata hian a ti.
Zawhna chhangin PC hruaitu chuan, hydel project siam turin Bairabi chiah khuah nghal mai theiha clearance awmsa a awm tih a sawi a. Kum 5 chhunga hydel project puitlin mai chu thil har a nih tur thu sawiin, khuah mai theiha clearance fel sa Bairabi pawh kum 5 chhunga zawh vek chu thil har tak tur a ni tih a sawi a ni.
Sawrkar inrelbawlna hautak lutuk tihreh a ngai – PC president
