Sawrkar laipui hmalakna thar – Viksit Bharat Sankalp Yatra Aizawl district-a kalpui dan tur sawihoin Thawhtanni khan Aizawl bawrhsap Nazuk Kumar hoin thutkhawm a ni. Hemi hnuaiah hian mipui hamthatna tura sawrkar laipui ministry hrang hrang hnuaia hmalakna a kalpui chuan mipui a thlen a, a mamawhtuten hamthatna an chan ngei theih nan ngawrh zawka puanzar leh inhrilhriat a ni.
Bawrhsap chuan department hrang hrangten scheme an neih chu mipuiin an hre tawk lo fo thin, tiin, Viksit Bharat Sankalp Yatra chu mipui hamthatna tura scheme hrang hrang duante mipuiin an hriat tlan vek a, tangkai taka hman a nih theih nan a kaihhnawih department tinten ngaipawimawh turin a duh tih a sawi a ni.
He hmalakna hnuaiah hian state pawn atangin a bika ruahman lirthei (van) rawn tirin, inhrilhriatna hna hi khaw hrang hrangah kalpui a ni ang. Welfare scheme dawng thei (eligible) si, la inziaklut lote hnenah inhrilhfiah a ni anga, sawrkar laipuiin a duan anga ziahluhna hun siam leh beneficiary-te nena inkawm a kengtel a ni. He Yatra kalpui dan tur hun leh hmun duan chungchang hi thut-khawmah hian sawiho a ni.
Thutkhawmah hian LESDE, UD&PA, H&FW, I&PR, DRDO, Social Welfare aiawhte leh BDO te, lead bank manager te an tel.
Sawrkar laipui ruahmanna bawhzui dan tur sawiho
