Sawrkar leh thuai ka inring – Lalsawta

Ram leh mipui tana tha an zawn reng a, chutianga an kal chuan an sawrkar leh thuai a ring tih Congress president Lalsawta chuan a sawi.
Zirtawpnia Congress Bhawan-a political session neihah Lalsawta chuan, hun tharah kan lut a, hun hlui chu a liam tawh a. Congress party pawhin Mizo mipui, a bikin thalaite hip zawnga party kalphung an her danglam a ngai tih a sawi.
“Congress party-in Zoram mipui tan hmathlir thui tak kan nei a, chu kawng tha leh ram dinchhuahna chu zawhpui kan tum a ni. Kan party kalzelna turah kan ram tan a tha em, mipui tan a tha em, tih hian min zawt reng dawn a, kan sawrkar leh thuai dawn tih kan ring tlat a ni,” a ti.
Congress kalzelnaah an kalsual loh a, mipui nena lungrual taka an kal theihna tur chu, mahni lam indahtha in, an rawngbawl sakte chu an ziawm deuh em, an harsatna engtin nge kan chinfel theih ang, tih an ngaihtuah ber chuan, he ram hi siamthatin a awm dawn a, chu chu an party kal dan tur a ni tih MPCC president hian a sawi.
“Pathian duh zawnga kan party hi kan kal tlat chuan, kan ram rorelna hi kan kutah bawk min pe leh ngei ang,” a ti.