Sawrkar nen Hnahsin Kut huaihawt dawn
Champhai-a Hnahsin Kut huaihawttu Champhai Nature Conservancy ngen angin he Kut hi sawrkar nen tih dun tum a ni dawn.
Tourism minister Lalnghinglova Hmar hoin Tourism department, Champhai Nature Conservancy (CNC), Champhai North Joint Village Council leh Champhaia NGO hrang hrang aiawh an inkawm a, Hnahsin Kut kalpui zel dan tur leh Kut lian chho zel dawnsawn dan tur an sawiho.
Minister chuan Champhai khawtlang leh mipui tangrualin Mizorama Kut lian ber pakhat an buatsaih thei chu lawmawm a tih thu a sawi a. “Mizoram chhung leh pawn atangin Hnahsin Kut chhim tur an lo la kal belh zel dawn a, mikhual an la pung zel dawn. Mikhual dawnsawn kawngah Champhai khawpui inpuahchah a ngai a, a bikin tourism kaihhnawiha eizawngte uar zawka zirtirna pek an ngai,” a ti.
Champhai district chu pipute hmun pawimawh tamna a ni a, Hnahsin Kut hmanga Champhaia tlawhtuten district chhung hmun danga tourist site an tlawh tel theihnan ngaihtuahna sen tul a tih thu a sawi. “Hnahsin par leh Champhai district mawina behchhanin Hnahsin Kut kalpui dan her rem hret theih niin a lang a. Chutiang tur chuan rawtna ngaithla a, sawiho turin kan lokal a ni,” a ti.
Hnahsin Kut kalpui mek dana hmasawn ngaihna lai leh Kut hman dan tihmasawnna atan kil hrang hrang atanga rawtna awm sawiho a ni a. Bul tanna atan Champhaia tourism kaihhnawiha eizawng hrang hrang, a bikin homestay, hotel leh restaurant neitute leh tour guide ho chu kumin June hmain Tourism department-in training pe se tih a ni.
CNC-in a ngen tawh angin, Hnahsin Kut buatsaih kawnga thawhho dan tur pawh Tourism department leh CNC aiawhten an sawiho nghal a. A buatsaih leh funding kaihhnawih hautak chho zelah ‘community -based festival’ a nihna bo si loin, sawrkar nen mumal zawka thawhho dan dap a ni. Sawrkarin festival a buatsaih dan kalphung sawiho nghal a ni bawk.
Sawrkar nen Hnahsin Kut huaihawt dawn
