Sawrkar office dawhkanah
PWD minister a campaign
– Congress Thalai
Local council leh village council inthlan turah PWD minister chu sawrkar office dawhkanah ZPM tan a campaign niin Congress Thalai chuan an sawi.
Congress Thalai Hqrs. thuchhuak chuan, LC/VC inthlan turah mipui aiawha ram rorelna thutthleng tibawrhbanga thuneihna hmangsualin, ZPM sawrkara chief minister, minister-te, MLA leh an party worker-ten midang dikna leh zahawmna palzut a, thlemna leh tawktarh tenawm tak tak nen kohhran leh NGO kawra hmangin an che vak mai niin a sawi.
‘PWD minister Pu Vanlalhlana chuan Mizorama thleng ngai lo leh la awm ngai lo sawrkar office dawhkan zahawm tak atangin ZPM tan a campaign-na video clip tichhuakin ZPM worker-ten an ti darh nasa hle a. Hei hi dan bawhchhiatna leh mipui zah lohna dik takah kan ngai a. Mipuiin rilru fim leh duhthlanna ngeia an aiawha roreltu tur an thlen theihnan a tul angin hma kan la zui dawn,’ a ti.
VC leh LC inthlan chu tluang leh fel taka neih a nih ngei a beisei tih Congress Thalai hian sawiin, mipui aiawhtu local council leh village council member thlan hun chu sawrkarin mipui thlan lal ve tho te a palzut avanga an term, an duh thlan pawh ni loa a pawhtawi sak vanga neih ngai a ni tih a sawi.
Sawrkar office dawhkanah PWD minister a campaign – Congress Thalai
