Sawrkar pisa-ah HIV test ti dawn
HIV darh zel tur venna kawng khatah Lungleia sawrkar pisa-a thawktute zingah HIV kai leh kai loh endik tum a ni.
District AIDS Prevention & Control Committee (DAPCC) Lunglei chu additional DC Rochuangkimi Khenglawt kaihhruaiin Nilaini khan an thukhawm a. Mission AIDS Suraksha inhrilhhriat niin, an district dinhmun (profile) thlir ho a ni. District Action Plan hnuaia kumin chhunga hma lak dan tur an sawiho bawk.
DISHA CPM report-a a lan danin, April 2025 atanga March 2026 chhungin Lunglei district-ah HIV kai hmuh chhuah thar mi 105 awmin, mipa 67 leh chu hmeichhia 38 an ni. Hmeichhia HIV kai zingah hian nau pai lai 6 an tel. HIV kai thar zingah mipat hmeichhiatna atanga kai 66.67% awmin, inchiuna hriau thianghlim lo atanga kai 31.31% leh nu HIV kai atanga fate kai chhawng 2.02% an awm a. HIV kai thar zinga 84.85% chu kum 15 – 49 inkar an ni.
Mission AIDS Suraksha atana District Action Plan ruahman niin, Lunglei district-a HIV/AIDS darh zel tur venna atan mahni dinhmun inhriatchian a pawimawh zia leh hemi atan hian HIV leh Syphilis endik (test) uar a tul tih sawi a ni. Kumin chhungin Red Ribbon Club awmna college pasarihah HIV/AIDS chungchang inzirtir leh endik nise, tiin, sawrkar pisa a tam thei ang berah HIV test kalpui nise tih a ni. Kumin May-a Healthy Lunglei District Campaign hnuaia hmalakna turah HIV endik telh ve nise, an ti a; tlawmngai pawl hrang hrang leh kohhran nen thawh ho dan tur rel a ni bawk.
Sawrkar pisa-ah HIV test ti dawn
