High School Leaving Certificate Examination 2026 result-ah sawrkar school-in hma an sawn avangin an lawm hle tih School Education minister Dr Vanlalthlana chuan a sawi.
School Education minister hian thuchah siamin, ruahman lawk anga Mizoram Board of School Education buatsaih HSLC Examination 2026 result tihchhuah a ni chu lawmawm a tih thu a sawi a. Zirlai exam hmachhawn mi 18257 atanga zaa 80.31 in hlawhtlinna an chang leh nikum aia pass percentage a sang a, zaa 80 a kai thei chu lawmawm a tih thu a sawi.
Kumin HSLC result chhuakah hmasawnna lawmawm tak, sawrkar school-ah a lang tiin, “Nikuma sawrkar school-a pass zaa 68.01 chu kumin hian khumin zaa 72.07 an pass a, candidate zawng zawng an fail vekna school-ah RMSA School la nei nual mah ila, sawrkar school tih hmingpu an lang tawh lo leh zaa za an pass vekna school-ah kum dang aia sawrkar school an lang tam hi a lawmawm a. Kan result hian zirlaite tan sawrkar school a belhtlak tih a rawn tarlang a ni,” a ti.
Kumina result tihchhuah dan chu a lo puanzar tawh angin, kum dang aiin a danglam a, top ten leh division an lang ta loa, MBSE website-ah erawh zirlaiten an mark leh percentage an en zung zung thei a, hei hi Board dang pawhin an kalpui dan a ni tih Dr Vanlalthlana hian a sawi. Hei hian a tha zawnga nghawng a neih chhoh zel a beisei tih a sawi bawk.
“Zirlai hlawhtlinna chang tharte ka lawmpui a; an hmalam hunah hlawhtlinna an chan zel theihnan duhsakna sang ber ka hlan a ni. Hlawhtlinna chang zo ta lote pawh beidawng mai loa nasa zawka tan la sauh sauh tur leh result lawmawm nei thei ngei turin ka chah a ni,” a ti.
Minister chuan a hun taka result chhuah theihna tura buaipuitu MBSE, school zirtirtute, zirlai nu leh pa, khawtlang leh zirna kaihhnawiha theihtawp chhuahtute chungah lawmthu a sawi a. Mizoram zirna-in hma a sawn zel theihnan theihtawp chhuah chhunzawm turin a sawm tih a sawi a ni.
Sawrkar sikul hmasawnnaah ka lawm: – Education minister
