Vawiin December ni 12 hian ZPM party kaihhruai sawrkar thar hnuaia Mizoram Legislative Assembly session hmasa ber, ni thum awh tur chu neih a lo ni dawn ta a; Mizoram political history-ah bung thar danglam bik kaina tia sawi theih a ni awm e.
Tunhmaa Congress leh MNF kaihhruai sawrkar inchhawk zak zak hnuaiah khan, sawrkar term han thar ve bawk thin mah se, a mihring ngai leh ngaia te tho khan sawrkarna an chelh leh tho thin a. Tuna sawrkar thar hi chu a thar takzet tawh a, tunhmaa sawrkarna la chelh ngai lo, Speaker veilama thu thinte leh, a tam zawk daihte phei chu vawikhat mah Legislative Assembly Session-a MLA thutna, Speaker veilam emaw, dinglam emaw pawh la luah ve ngai reng reng lote an ni a. House chhung boruak eng tin nge a awm dawn tih chu Zoram mipuiin an hmuh chak berte zinga pakhat a nih a rinawm a; chu chu vawiin hian kan hmu dawn ta a ni.
India ramah Mizoram Legislative Assembly Session kalphung hi entawntlak tia sawi hlawh thin a ni a, member-ten session neih laiin khawsak dan mawi an zawm tha thawkhat nia sawi a ni. Chuti chung chuan, House chhung boruak han ‘hot’ ve deuh changte chu a awm a, tawngkam tlahawlh deuh leh tawngkam mawi lo deuh te, MLA tiha mawi lo (unethical conduct) te pawh a thleng ve ta zauh zauh a. Session laia duhthawh taka tawngkam hman chang te, House pawn lama han inban zuau zuau changte pawh a thleng ve tawh a. House chhunga MLA thenkhat tawngkamte phei chu pawn lamah social media-ah te pawh a darh nasain, chu chuan nghawng tha lo tak a nei zui a. Mipui aiawha rorel tura rorelna in sang bera thute khawsak phung tha lo hi pawn lamah mipuiin an lo ‘copy’ a, House chhungah pawh duh duh an sawi tho alawm ti niawm fahrana, serh leh sang nei lo leka social media lama comment mak pui pui hmuhtur a tam thin hle a ni.
Tun term-ah hian mipuiin term dang aia sawrkar tha an beisei tih an lantir tawh a, vawiin atang hian mipui aiawha rorelna a intan dawn ta a. House member-te pawhin theihtawp han chhuah se, House chhung boruak hmasawnna leh ramchhung hmasawnna thar tha tak thlentir turin tan han la mawlh teh se.
Sawrkar thar session hmasa ber
