Sawrkar zirna ina PwD tana
ruahmanna siam dan endik
Persons with Disabilities (PwD) commissioner Vanlaldiki Sailo hoin ‘Sugamya Yatra’ pualin Zirtawpni khan sawrkar zirna in endik (access audit) a ni a. National Institute for Locomotor Disabilitites (NILD) aiawhte an tel.
Heng hmun an endiknaah hian siamthat ngai awm chu siamtha tura hrilh an ni a. Govt. Sihphir Higher Secondary School, College of Veterinary Sciences & Animal Husbandry, IGNOU Regional Centre Aizawl, ICFAI University Mizoram leh Govt. Primary School-II Durtlang an tlawh a ni.
Sawrkar laipui chuan India rama rualbanloten veivahna kawnga harsatna an tawh lohna turin ‘Accessible India Campaign’ (Sugamya Bharat Abhiyan) a duang a, hemi hnuaiah hian ‘Sugamya Yatra’ hi kum 2015 atang khan kalpui a ni. Wheelchair hmang, mitdel leh rualbanlo dangten biak in, sawrkar in, zirna in leh mipui punkhawmna vantlang building hrang hrang an thlen ve theihnan an kal theihna tur bik (wheelchair ramp, lift, signage adt) siam turin thupek a chhuah a. Sugamya Yatra hi India ram puma kalpui niin, Audit Team leh rualbanlo thenkhatten an endik a ni.
Mizoramah pawh PwD Commissioner office leh NILD tangdunin kumin February 21 atang khan an kalpui tan a. Mizoram district 7-ah he campaign hi kalpui tawhin, Mizoram pum endik chhuah vek tum a ni.
Sawrkar zirna ina PwD tanaruahmanna siam dan endik
