Hun reilote ah ad-hoc school thenkhat chu sawrkarin provincialise a tum tih chief minister Zoramthanga chuan a sawi.
MIGASTU (Mizoram Govt. Ad Hoc Aided School Teachers’ Union) chuan Ningani khan Aizawlah inkhawmpui an hmang a. He hun hmanpuitu chief minister chuan hun reilote ah ad-hoc school thenkhat chu provincialise tum a ni tih a sawi a. MIGASTU-in sawrkara an thil beisei an thlen chu a theih leh remchan dan ang zela a hlawhtlinna tur dap a ni, tiin, ad-hoc aided school-te provincialise chungchang chu sum dinhmun zirchiang chungin school provincialise tura hmalakna hi a tahtawla kalpui tum a ni tih a sawi.
Ram hmasawnna atan hmathlir tha neih a pawimawh tih sawiin, “Ram hmangaihna tak tak nen hmathlir, tum ram nghet tak nen ramin hmalam a pan zel a pawimawh,” a ti. Mizoramin zirna kawnga hma a sawn zelna tura mawhphurtu pawimawh berte zing ami zirtirtute chu tha thlah loa thahnemngai taka hna thawk zel turin a chah.
He hun hmanpuitu dang School Education minister Lalchhandama Ralte chuan zirna tihhmasawnna tura sawrkar hmalakna a sawi a. Sawrkarin zirlaite leh zirtirtute hmakhua a ngaipawimawh thu te, education huangchhunga association hrang hrang nen thawhhona tha an nei zel chu lawmawm a tih thu te, sawrkarin sum dinhmun tha tawklo tak chung pawhin a remchan dan ang zela an hmakhua a ngaihtuah thu te a sawi a ni
MIGASTU hnuaiah hian Mizoram khaw hrang hrangah high school 129 leh middle school 64 a awm a, thawktu 1300 an awm mek.
Sawrkarin adhoc school thenkhat provincialise a tum – Chief minister
