Buhhum lei chungchangah harsatna a awm avangin sawrkar chuan lei a tum tawh loa, buhfai thar lei a nih zawk theihnan ruahmanna siam mek a ni tih Agriculture minister PC Vanlalruata chuan a sawi.
Loneitu intelkhawm leh mimal paruk hman tur, Custom Hiring Centre hnuai atanga tractor 25 leh hmanraw chi hrang hrang lei chu Thawhlehni khan Agriculture & Farmers’ Welfare minister hian a vailiam a. Loneituten leilehna hmanraw tam zawk an neih theihnan sawrkarin a theih angin hma a la zel tih sawiin, kumin annual action plan-ah pawh farm mechanization atan sum tam zawk ruahman a ni tih a sawi.
Buhhum lei chungchangah harsatna a awm avangin buhhum lei tawh loa, Mizorama buhfai thar lei a nih theihnan sawrkarin policy mumal tak nei turin chak takin hma a la mek tih a sawi bawk.
Oilseed tam zawk tharchhuah a nih theihnan leilet neituten nasa zawka hma la a, sawrkar laipuiin ruahmanna a siamte hmang tangkai turin a fuih a. Khawl leh hmanraw dang an dawn chu duat leh uluk taka enkawl a, tangkai taka hmang turin a chah.
Kumin hian tractor leh leilehna hmanrua 61 sem tura ruahman niin, heng hi Sub-Mission on Agricultural Mechanization scheme hnuaia sum hmuh atanga pek tur a ni. CHC pakhat zelah khawl leh hmanraw leina tur sawrkarin zaa 95 (cheng nuai 14.25) vel thleng a tumsak thin a. Zaa 5 chu loneitute tum tur a ni. An tractor lak duh azirin a man atana sawrkar sum sen hi a danglam thin bawk.
Company pali siam tractor pechhuak tur hian sawrkar chuan approved dealer pali a nei a. Tractor leh a hmanrua dawng tura thlan farmer intelkhawm, Group of Farmers hian approved dealer-te atangin an tractor duh ber an thlang thin a ni.
Sawrkarin buhhum lei tawh dawn lo
