Sawrkarin sum a puk a rul tha
– Zoram People’s Movement
Mizoram sawrkar kal mekin sum a puk a rulh lehna a tha a, mipui hnena chhuak leh tur pawh a pechhuak tha tih ZPM party chuan an sawi.
ZPM Gen. Hqrs. thuchhuak chuan, 2024- 2025 sawrkar kum (kumin April to September) chhunga Mizoram sawrkarin leiba tel loa sum a hmuh tawh chu cheng vaibelchhe 4093.67 a ni a. Budget estimate atangin zaa 33 a ni, tiin, nikum (sawrkar kum kalta) tun ang hunah khan zaa 27.97 hmuh a ni, a ti.
Chhiah atanga sawrkar sum hmuh hi vbch. 2834.08 niin, beisei zat atangin zaa 38.24 hmuh a ni tawh a. Nikum tun ang hunah khan beisei zat zaa 36.51 hmuh a ni tih a sawi.
Sawrkar kum kal meka sum puk tawh hi cheng vbch. 1058 a ni a, puk tur beisei zat atangin zaa 77 puk tawh a ni a. Nikum tun ang hunah khan vbch. 1871 puk tawh niin, sum puk beisei zat atanga zaa 147.22 puk a ni tawh tih sawiin, sum puk nikum aia a tlem zawkna hi vbch. 800 chuang a ni tih a sawi a ni.
Nikum tun ang hun (thla 6 chhung) ah khan cheng vbch. 119 leiba tlingkhawm sum lu atanga a pung ringawt pek a ni a, thla 5 chhungin vbch 13 chauh a pung hi rulh a nih laiin, kuminah April atanga September thleng khan sum lu atanga a pung tlingkhawm vbch 198.29 sawrkar chuan a rul der tawh tih a sawi bawk.
Hmasawnna ruhrel dinna bikah nikum tun ang hun, thla 6 chhung khan cheng vbch. 4 chauh hman a nih laiin kuminah chuan vbch 88 pek chhuah hman a ni tih a sawi a. Public accounts atanga sum pek chhuah tawh zat hi April 1 atanga October thleng khan cheng vbch.1024.07 a tling hman tih sawiin, K-Deposit (sawrkar hmasa bill ba) pawh vbch. 424.26 chhuah a nih tawh bakah sawrkar hnathawk GPF leh retirement benefits/ pension chhuah chu vbch. 599.82 a tling hman tawh tih a sawi.
Open Market Borrowing atanga thlatin sawrkarin sum a puk chu budget-a dah sa thlap; mamawh thar thut vanga puk ni loin, kan sum hmuh a hnarin a daih loh hmasawnna ruhrel dinna tur leh leiba sum lu rulhna atan puk tura ruahman a ni a. Kumin chhungin leiba sum lu ringawt pawh vbch 460 leh a pung vbch. 604 rulhna tur budget pass vek a ni tawh tih a sawi a ni.
‘Zoram mipui nawlpui hriat angin, hun rei tak Mizoram sawrkar sum dinhmun chuan that lam pan hleithei loin a lo bawksawp reng tawh thin a. Budget vawikhat pawh la pharh ngai loten Mizoram sum an enkawl ve chinah erawh hmasawnna thar kan hmu ta hi lawmawm kan ti a, Finace changtu chief minister Pu Lalduhoma leh adviser to chief minister (Finance) Pu TBC Lalvenchhunga bakah Finance department-a thawktute chungah Zoram mipui aiawhin lawmthu kan sawi a ni,’ ZPM thuchhuak chuan a ti.
Mizoram sum dinhmunin hmasawn lam a pan dan adviser to CM Pu TBC Lalvenchhunga sawi a nih bakah heng hi CAG website-ah en theihin a awm tih an sawi.
Sawrkarin sum a puk a rul tha – Zoram People’s Movement
