Sawrkarin thlai leisak bik tura a ruatah direct-in an leisak dawn loa, a leitu turte nen an indawrnaah a pui dawn zawk tih Horticulture minister Prof Lalnilawma chuan a sawi.
Thawhlehnia Assembly Session neihah member-te Siaha bialtu Dr K Beichhua zawhna chhangin Horticulture minister chuan, thlai lei tur thlan bik sawrkarin lei a tum a, chutihrualin a sumfaiin a va leisak vek dawn loa, facilitator-a tan a tum tih a sawi. “Sawrkarin direct-in a leisak vek dawn loa, society leh a leitu turte indawrnaah a facilitate sak dawn a ni,” a ti.
Thlai chin leh hralh chu theih ang tawkin research base-a kalpui zel a ni tih a sawi a. Engzatin nge ching a, engzat nge an thar dawn tih pawh research base vek a ni a. An thar zat tur an chhut chhin a, a leitu tur pawh an zawng mek tih Prof Lalnilawma hian a sawi.
Sawhthing chu Rs.50 aia hniam loin hralh tir tum a ni a; hmunphiahah grade a awm dawn tih sawiin, grade ‘A’ ah Rs.100, grade B ah Rs. 80 ruahman niin, a variety leh seng hun azira then a ni tih a sawi.
Thlai thlan bik leina tur hian khaw tinah multi purpose farming cooperative society din tawhah an inngai a, data entry buaipui mek a ni tih minister hian a sawi bawk.
Sawrkarin sumfaiin thlai lei dawn lo – Horticulture minister
