Sazuk kapa a saa sumdawng nia puh, Rabung leh Pamchung khaw mi pali chu Inrinni khan Champhai District Court chief judicial magistrate thupek angin Champhai District Jail-a dah luh an ni.
Thudawn danin, sazuk kapa puh hi Lalngilneia, Zohmingthanga leh Hmangaihzama, Rabung khaw mi vek leh Lalpianmawia, Pamchung an ni. February 13 khan Aiduzawl peng, Ngopa panna kawngah Khawzawl Wildlife Division hnuaia Wildlife Guard duty-ten sazuk sa hi pik-up MZ-06 6411, Aizawla kal tur chu lo endikin, sa fun 21, kg.26.5 a rit chu an lo man a ni.
Sazuk hi danin a humhalh, Wildlife (Protection) Amendment 2022 hnuaia Schedule-I a dah a ni a; a tihlum emaw a sa zuar emaw chu kum 3 tal lung in tan leh kum 7 thleng lung in tan theihna a nih bakah Rs.25000 aia tlem lo chawi tura hrem theih a ni.
Sazuk kah leh a sa zawrh tira puh mi 4 jail-ah dah
