SC-in June 1 thleng Kejriwal interim bail phalsak

Supreme Court chuan Delhi Chief Minister Arvind Kejriwal chu Lok Sabha election thawh sarihna vote thlak ni tawp ber June 1 thlengin interim bail a phalsak.
Aam Aadmi Party leader hi Enforcement Directorate te chuan March 21 khan Delhi liquor excise policy scam kaihhnawihah an man a. Supreme Court chuan Kejriwal chu June 2 a lung in thuneitute hnena inpe turin a hriattir nghal bawk.
Enforcement Directorate aiawha ding Solicitor General Tushar Mehta chuan interim bail pek chu dodalin inthlan chhuanlamin ED tena an kohna tum thum tum li a chhang duh lo a ni a ti a. Justice Khanna chuan ‘March thlaah man a nih kha’ a lo ti thung.
Court chuan bail condition chu AAP leader tho Sanjay Singh laka kalpui nen a inang ang a ti a. Singh chu Rajya Sabha MP niin nikum October thla khan man a ni a, thlaruk hnuah bail-in chhuah a ni.
A pawimawh lai ber chu political activities a tih phalsak a ni a, party tan a campaign thei a, chutiang bawk chuan Kejriwal pawh campaign in a kal thei dawn a ni.
AAP boss tana ding senior advocate Abhisehk manu Singhvi chuan interim bail chu June 4 thleng inthlan result puan ni thleng a ngen a. Mahse, chu chu hnawlin court chuan inthlan thawh sarihna zawh hnu darkar 48 ah chauh vote chhiar a ni chauh dawn a ti ve thung.
Ningani khan ED te chuan Kejriwal bail chu nasa takin an dodal a. Central agency te chu an chetdanah sawiselna nasa tak tawk mek niin BJP te tana chetla leh inthlan dawna BJP te elpui te vau thina puh an ni a, ED te chuan politician tumah khua leh tui pangngai aia dinhmun sang bik chelh thei an awm lo tiin Kejriwal bail an duhlohna an lantir a ni.
Kejriwal chuan inthlana campaign duh avanga bail a nih theihna tur ‘fundamental rights’ a nei lo tiin ED te chuan an sawi bawk a. Party leader tumah criminal case nei inthlan campaign avanga chhuah zalen an la awm lo tiin an hnial bawk.
Thawhlehni a hearing neihnaah erawh court chuan Keriwal chu elected chief minister a ni a, thiltisual fo thin (habitual offender) a ni lo ti thungin, “Inthlan a awm mek a, hun danglam a ni a, thil tisual fo a ni lo,” tiin bench of Justice Sanjiv Khanna leh Justice Dipankar Datta te chuan an sawi thung.