Kuki-Zo community apex body te chuan Manipur-ah National Register of Citizens (NRC) chu Supreme Court kaihhruaina hnuaia neih a nih chuan an dodal dawn loh thu an sawi.
Kuki Inpi Manipur (KIM) te chuan Assam a NRC neih ang kha Neitei leh Naga organisation ten Myanmar atanga Manipur a lutrute enfiah nan neih ni se an tih hnuah thudehkilh neiin an pawm thu an sawi.
Assam chuan NRC a lo nei fel tawh a, mahse, August 2019 a tihchhuah a nih hnuah engmah kalpui zui hleihtheihlohin a awm a. Assam NRC hmangin 3.3 crore application atangin 19.06 lakhs vel te chu foreigner angin a chhuah a ni.
KIM te chuan India khua leh tui ni lo te finfiah tumnna tak tak chu an thlawp thu sawiin ‘constitution rules leh principles’ behchhana kalpui ni se, NRC chu Supreme Court in tribal organisation te rawnin khauh takin kalpui se an duh tiin an sawi a.
“Chu mi hnuah illegal immigrant hmuhchhuah te chu Kuki, Naga emaw Meitei tu pawh dan ang thlapin an chungthu ngaihtuah ni bawk rawh se” tiin KIM leader Janghaolun Haokip chuan a sawi.
“Meitei ten rawng taka kan mite an beihna hi titawp rawh se, chumi hnuah chauh chuan Kuki-Zo te chennaa NRC chu kalpui theih a ni chauh ang” tia sawiin Kuki-Zo mite humhim an nih theih nan Union Territory a ngai a ti bawk.
“Meitei sorkar thuneitute kan mi te rapbet leh sawisaa nunna 186 lai hloh a nihna, chenna in 7,000 chuang hal leh tihchhiata Kuki-Zo mi 41,000 chuang chenna in nei lova siam tute hian kan mite hmalam hun chungchangah engmah thuneihna an nei lo” tiin Haokip chuan a sawi bawk.
A hma lawkin Coordinating Committee for Manipur Integrity leh United Naga Council te chuan Manipur Governor Anusuiya Uikey chu kum 1951 behchhana hmangin State ah NRC kalpui turin ngenna an thehlut a ni.
“Illegal immigrants te hian he State a cheng nghet sa te dinhmun derthawngah an siam a ni” tiin joint memorandum an siamah an tarlang a.
Meitei, Naga leh Kuki-Zo te hi Manipur a ethnic group lian ber ber pathum an ni a. May 2023 a Meitei leh Kuki-Zo te inkara buaina chhuak avangin mi 220 chuangin nunna chan tawhin mi 70,000 chuangin chenna in leh lo an chhuahsan tawh a ni.
SC kaihhruaina hnuaiah NRC duh
