SC thutluknaah BJP-in engmah la sawi lo

Supreme Court-in State sorkar ten Scheduled Caste category sub-categorisation a remtihsak atanga kar khat hnuah pawh Bharatiya Janata Party (BJP) te chuan thuchhuah emaw sawi engmah an la nei lo va, an la ngawi char char a ni.
BJP ten ngawih an chuh chhan hi party chhungah a then an lawm laiin a then te chuan Other Backward Classes (OBCs) reservation a ‘creamy layers’ ang chu Scheduled Caste category-ah pawh hman a nih an hlauthawng an ti thung.
Party spokesperson leh Chairperson of the National Commission for SCs and STs hlui (khatihlaia joint Commission), Bizay Sonkar Shastri chuan Supreme Court thutlukna chu lawmawm a tih thu a sawi a. “ Chairperson of the Commission for SCs and STs ka nih lai khan zirchianna kan neihah SC category ah castes 1,208 vel lai a awm a, sub-castes 10,000 chuang a awm a ni. SCs te thatna duh te chuan Supreme Court thutlukna hi lawmawm an ti vek ang a, BJP ah pawh Prime Minister Narendra Modi a policy ‘Sab ka saath, sab ka vikaas’ duhtute chu an lawm vek bawk ang,” tiin a sawi.
Chutih laiin Arun Kumar Sagar, Shahjahanpur BJP MP leh Jatav community member ni bawk chuan SC quota-ah ‘creamy layer’ concept lakluh a nih a hlauh thu a sawi thung a. “Khawih thianglo tih te hi a la awm reng a, Dalit community mi in dinhmun sang tak chelh pawh ni se, eng economic criteria nge hman a nih ang? Creamy layer hman a ni mai dawn em ni?” tiin a sawi.
BJP chhungah ngaihdan inang lo a awm nuai laiin political scientist Badri Narayan chuan BJP ten ngawih an chuh rihna chhan chu Supreme Court thutlukan hian politics-ah nghawng a neih ngei dawn vang a ni a ti.
“Supreme Court thutlukna siam hian Scheduled Caste category chu dominant leh non-dominant community angin a hmu a, chuvangin reservation benefit pawh a hrangin kal se a duh a, politics thilah pawh non-dominant community te chuan an la man fiah vak loh avangin politics thila bloc pawimawh angin an awm lo mai thei. Mahse, sub-categorisation chuan dominant leh non-dominant section te chu a thenhrang dawn ta a, chuvangin chu mi avanga politics inthlak danglam tur chu la tawnhriat chauh tur a ni” tiin Prof Narayan chuan a sawi a. “He thila chiang te BSP (Bahujan Samaj Party), leh Chirag Paswan’s Lok Janshakti Party (LJP), bakah ‘Mahadalit’ category kalpui tu JD-U (Janata Dal-United) te chu an chian em avangin an ngaihsan tlanghrakin an sawi nghal mai reng a ni,” tiin a sawi bawk.
BJP te mai ni lo Congress te pawh Supreme Court thutluka in polarisation a siam chuan politics-ah an hlawkpui dawn em tih an chiang ngam lo. Chuvangin an dinna chiang taka sawi chuan community pakhat zawk a hliam thei tlat bawk si a ni.
National Democratic Alliance (NDA) allies ah pawh ngaihsan a inang hek lo. LJP Chirag Paswan chuan court thutlukna a duh loh thu a sawi laiian Jitan Ram Manjhi of the Hindustani Awam Morcha (HAM) leh JD(U) te chuan Bihar a Dalit category chhunga Mahadalits siam pawmpuina tiin an pawm thlap thung.
Supreme Court in State sorkar te chu Scheduled Caste community te sub-categorised a remtihsakna hian politics a thlak danglam ngei dawna ngaih a ni a, tu party mah a nghawng loh an awm dawn lo tia sawi a ni bawk.