Scheme thar PM- DAJGUA inhrilhfiah
Sawrkar laipui scheme thar, PM- DAJGUA (Dharti Aaba Janjatiya Gram Utkarsh Abhiyan) kalpui turah a kaihhnawih department aiawhte tan Zirtawpni khan Aizawlah inhrilhfiah a ni. Aizawl district bawrhsap Er Lalhriatpuia chuan a telpui.
PM-DAJGUA hi ministry 17-in tribal community-te socio-economic dinhmun siamtha a, tribal chhungkua leh tribal tam zawkna khua, aspirational block-a khua, tribal chen tam bikna hmunah hmasawnna atana hmanraw mamawh hmanga chawikan tura thawhhona scheme a ni a. Ministry of Tribal Affairs chu nodal agency niin, Mizorama nodal department chu Social Welfare & Tribal Affairs a ni.
Hmunhma hman theih tur tihchangtlun, tribal tamna khaw thlanbik intodelh kawnga an dinhmun tihchangtlun chu a thil tum ber a ni a. Kum 5 (2024-2025 atanga 2028-2029) chhung kalpui tur niin, he scheme hian India rama district 549, block 2911 leh khaw 63843 a tribal mi vaibelchhe 5.38 a huam dawn. Mizoramah pawh khaw 383-ah hman a ni anga, Aizawl district-a khaw 42-a kalpui a ni dawn a ni.
Tribal khuaa mi 500 emaw a aia tam chenna, ami cheng zaa 50 tal tribal an awmnaah kalpui tur a ni a. Aspirational block chhungah chuan mi 50 emaw a aia tam cheng awmna khua a ni tur a ni.
Development Action Plan for Scheduled Tribes atangin kum 5 chhung atan hian India ram pum tan cheng vaiblechhia 79156 ruahhman a ni a. Central leh state fund intum sem dan tur 90:10 niin, scheme thenkhatah erawh zaah za central tum tur a tel.
Scheme thar PM- DAJGUA inhrilhfiah
