Scholarship buaipui thiam lo zirtirtu

Nimin khan MSU General Headquarters chuan thuchhuah a siam a, chu chu— “School thenkhata scholarship khawihtu Institution Nodal Officer-te inthlahdah vangin zirlaiten scholarship an dawng dawn lo…; Cherhlun Higher Secondary School (Adhoc)-a zirlai scholarship dilte chu an school-in verification an tihsak loh avangin scholarship kumin hian an dawng thei dawn lo…; Lungrang ‘S’ High School (Adhoc)-a thawktute chuan scholarship buaipui an thiam loh chhuanlamin an zirlaite tan an buaipui thei lo niin kan hria a. Zirtirtu naupangte tana intuaithar peih tawh lo leh ngaihsak peih tawh lo an awm hi pawi kan ti… Zirlaiten scholarship an hmuh theih nana hma min laksak turin Mizoram sawrkar thuneitute kan ngen” tihte a ni.
Zirlaite tana Scholarship pawimawhzia leh tangkaizia hi sawi nawn fo a tul awm lo ve. Zirtirtute tan phei chuan a chiang viau ang. Zirlaiten scholarship an hmuh ngei theihna tura theihtawp chhuahsaktu tur chu zirtirtute an ni. Zirtirtute chu englai pawha intuaithar reng tur an ni a; khawvel thang zel mila thil thar, thiamna thar lo chhuak apiang lo ngaihvena lo zir thiam ve nghal zung zung tura beisei an ni. Thil thar na na na chu zir thar a ngai a, chu chu zirtirtuin naupangte a zirtir thiam zel thei tur a ni.
Lungrang ‘S’ HS chungchang thuchhuaha tarlanah hian, ‘scholarship buaipui thiamloh chhuanlam’ tih a lo lang hi a vanduaithlak hle. Buaipui thiamloh hi chu (thiam tura beisei an ni chungin) thil awm thei a ni a; mahse, a buaipui thiamte pan pawh tum lova zirlaite an tibeidawng erawh hi chu a pawi mai ni lovin a ‘thinurthlak’ lamah a kal zawk awm e. School thenkhat ‘inthlahdah vang’ tih lo lang pawh hi, a thinrimthlak a; ‘verification tihsak lo’ tih phei hi chu, a lungawilohthlak lehzual awm e.
Zirlaiten scholarship an hmuh theih lohna tur chhan hrang hrang MSU thuchhuahin a tarlan zirtirtute nihna pathum – ‘inthlahdah’ tih te, ‘verification tihsak lo’ tih leh, ‘buaipui thiam lo’ tihte hriattur a lo awm ta nawlh nawlh mai hian, zirtirtute quality tur a hril thui hle a, zirlaite an ngaihtuahawm takzet a tih theih ang. Zirlai pawl ten thuchhuah siam meuha an rawn auchhuahpui hi thuneitu sang zawkte pawhin, inthlahdah lovin ngaihsak zui mawlh teh se.