School education minister-in Aizawla sawrkar enkawl school thenkhat hrilhlawk lova tunhnaia a tlawh thu chanchinthar lamah kan hmu a. Minister hian school building dinhmun leh naupangte zirtirna an pek dan te a enpui a; heng school-a zirtirna an pek dan a that leh that loh chungchanga minister thlirna (comment) erawh mipui hriat tura tarlan a ni ta chiah lo.
Tunhma deuh kha chuan school inspection hi urhsun taka kalpui a ni thin a, kha khan ‘school tha’ inelna boruak a siam a, zirtirtute an tang a, zirlaite pawh an tang a, zirna tha (quality eduaction) pawh a awm phah deuh nge nge niin a lang. School endiktu tur a lo kal dawn tih hriat kha chuan, school compound tihfai te, school building chei that te, school inspector lo hmachhawn dan tur thleng khan lo inbuatsaih a ni thin a. Zirtirtute pawhin an zirlaite thiamna leh hriatna lo tuaihriam tumin, school inpsector zawhna chhang thei leh chhang thiam ngei turin nasa takin tan an lo la thin a, kha kha a hlawk thlak em em thin a ni.
Hetia han ngaih mai hi chuan, tunhma kum 40 vel kaltaa zirchhuakte kha tunlaia zir chhuakte hian, education qualification inang rau rauah, an tluk lo deuh ta em aw a tih theih awm e.
School Inspection chungchangah hian sawrkar chuan nikum October khan Circular tichhuakin, inkaihhruaina (Instruction) pawh tihchhuah a ni a. School endik hna kha November thla ral hmaa zawhfel tura tih kha a ni a; school inspection khan eng nge a hrut chhuah tak ber tih hi mipui nawlpui chuan kan hre pha tawh lo a, kha inspection atang khan eng thil thar nge zirchhuah a nih a, kuminah hian eng hmasawnna thar nge kan neih phah tih te, hmasawn zelna turin eng thil thar nge kalpui tul a awm em tihte pawh a hriat theih a rinawm a. School Inspection kan thatpui dante pawh hi mipui hriat tura report chakawm tak te pawh a awm lo nge, a reh riau hian a hriat a.
School Inspector-te chuan school dinhmun tak tak (quality of school; quality of teaching & school environment etc.) an endik dawn avangin, chumi lo dawngsawng tura school lo inbuatsaihna chuan hmasawnna a keng ngei ngei dawn tih a hriat a. Chuvangin, school inspection chungchang ‘news’ hi media lamah hmuh tur awm zur zut tawh se, hma kan sawn phah ngei pawh a rinawm e.
School inspection
