Mizoram sawrkar chuan khawtlang leh mi thahnemngaite enkawl school, sawrkar kuta dah theihna dan a siam tawh chu ennawnin zirchian a tum a. ZPM party-in manifesto-a a lo neih tawh ‘Development Bank’ siam tihhlawhtlinna atan Mizoram Development Finance Corporation din tum a ni bawk.
Thawhlehni khan Council of Ministers chu chief minister Lalduhoma kaihhruaiin an thukhawm a. An thu pawm zingah – School Education department atanga lut, school provincialise-na dan tih awlsam a, school tam zawk provincialise an nih theihnan Rules ennawn nise; sum leh pai senso ngai tur zat lo zirchian ni bawk se, tiin, he zirchianna hi Council of Ministers thutkhawm leha enho tura dah a ni.
ZPM party-in manifesto-a a neih – Mizoram Development Bank siam tum tihhlawhtlinna atan Mizoram Development Finance Corporation din turin rel a ni bawk a. Sawrkar flagship programme – Bana Kaih hnuaia loan latute leh entrepreneur-ten awlsam zawka loan an lak theihna tur niin, sawrkar thuneihna hnuaia kal loa, independent body anga kalpui tur a ni.
Interim Committee din phawt tur a ni a, he Committee hian Mizoram Development Finance Corporation a din theihnana thil tul a rawn chhawp chhuak dawn a ni.
School provincialise dan ennawn tum Development Finance Corporation din
